李克勤過去連奪兩屆無綫最受歡迎男歌星獎，今年他得獎呼聲同樣高唱入雲，若再冧莊便可與曾是三連霸的劉德華看齊，但無論是華仔、許志安、梁漢文或古巨基得獎，克勤亦戥對方高興，正如鄧萃雯失意「我最喜愛的女主角」獎，亦不覺得她輸。
李克勤去年及前年連奪兩屆無綫最受歡迎男歌星獎，若明年一月又再奪獎，便與劉德華看齊，成為該獎的三屆盟主。早前華仔與克勤同為無綫錄影《娛樂大搜查》節目，二人被指獲無綫欽點平分該獎，華仔又不時直指克勤勝券在握，克勤現時如正在「叫胡」，但他卻謂只服輸給劉德華，到底克勤是否很想奪獎？他日前接受本報記者訪問時說：「每個歌手都希望有獎，唔單止無綫嗰個，努力咗成年，有獎係獎勵，好好嘅甜品，冇都唔係世界末日，我以前都試過坐咗好多年都冇。」
大熱人選無論贏或輸都萬眾矚目，這樣會否加重了克勤的壓力？他說：「我過咗嗰段時間啦，第一次攞男歌手獎時的確好緊張，嗰年攞唔到就一世都冇，大家又覺得一定係我，唔係嘅話咪好丟架？心情好似第一次做爸爸咁，但舊年已經冇咁緊張。」
克勤表示假如該獎由許志安或古巨基奪得，也會戥對方高興，他說：「就算佢哋攞，我都戥佢哋開心，我同佢哋唔係好似同華仔咁熟，但都好多年朋友，安仔同阿梁（梁漢文）就一齊踢波，阿梁直情同我滴血咁滯，因為我哋都係曼聯躉。有時兩三點會收到SMS，一定係佢，有時半夜都會打嚟講波。」
克勤續說：「基仔𠵱家少見啲，我哋以前都係麻雀腳，所以邊個攞我都替佢開心。贏嘅話只不過多咗個獎，輸亦唔代表啲乜，華仔呢兩年都冇攞啦，你夠膽話佢唔紅咩？鄧萃雯做得咁好，我都唔覺得佢輸，當然黎姿亦好好，總之唔係攞獎就叫贏囉。華仔同我講，我哋跑緊長途賽，我嗰兩年攞獎唔代表就贏咗陳奕迅，或者佢出年返嚟連本帶利攞番呢！」
克勤一直有「無綫契仔」的稱號，似乎特別得寵，但這樣說又似乎抹殺其得獎的實力，克勤說：「我唔介意人講，冇得介意，好似『新四大天王』咁，如果真係有契仔咁好，我就唔使等十七年先得啦，我又唔係呢兩年先拍劇，如果拍劇可以換獎，我十年前就應該有，嗰兩年咪又係齋坐，毛都冇條，咁講法吳卓羲同林峯應該攞晒啲獎啦！」
無綫高層樂易玲曾公開表示，頒獎禮有爭議才有娛樂性，今年男歌手獎競爭激烈，克勤與華仔同被視為大熱，加上「新四大天王」爭到頭崩額裂，問他怕不怕無論結果如何，都會造成黎姿與鄧萃雯的尷尬處境？克勤說：「唔擔心，我唔覺得自己大熱，我同華仔嘅歌迷一早已經水乳交融，講受歡迎我幾時夠佢吖？我哋幾個都係靠歌，唔係咁偶像派。」
撰文：蔡如玉
攝影：仇志德
場地：五十年代餐廳
服裝：JoyceBoutique
髮型：JackyMaByHeadquarter
化妝：AngelYip
