梁洛施、Twins和Boy'Z昨日在旺角舉行簽名會,吸引近五百市民到場,非常熱鬧,本來Twins二人均穿着短裙,鍾欣桐(阿嬌)見場面墟冚,立刻換上長褲,以防被揩油。Boy'Z即表示願充當保安護花。
人氣組合Twins、Boy'Z及梁洛施(Isabella)昨日下午於旺角一唱片店為新聖誕專輯《JoyToTheWorldChristmasHits》舉行簽名會,為二百位歌迷簽名,另有百多位歌迷到場卻未能索取簽名,加上圍觀市民眾多,近五百人將該範圍擠得水洩不通。
蔡卓妍(阿Sa)看見人潮後不禁大叫:「好驚呀,未見過咁多人,啲男歌迷好熱情㗎!」問阿Sa是否怕遭男歌迷擁抱?她說:「應該唔會,有人喺隔籬護住㗎嘛!」其實Twins到旺角前,曾在銅鑼灣出席化妝品公司的開幕禮,二人均穿着短裙赴會,但到旺角後,阿嬌即保險地換上長褲,阿Sa卻忘記帶褲,師弟Boy'Z笑言要扮保安護花。
阿Sa被問到與鄭中基緋聞時,一臉不屑地說:「黐線,我日日都有嘢做,呢排見到記者㗎!」有指她近來緋聞甚旺,阿Sa說:「係呀,又鄭伊健又謝霆鋒,不過之前蘇民峰話我冇桃花運,都唔知點解咁多,冇所謂啦,由得佢傳囉!」問阿Sa有否與鄭中基共膳?她說:「有飲嘢,一齊拍《追擊八月十五》時咪有飲囉,之後都有見,但唔係日日,呢排都冇。我個樣咁揚,如果成日去歐陽震華間吧,實俾人影到啦!」
此外,Twins、Boy'Z及Isabella前晚在尖沙嘴為即將舉行的音樂會排舞,Kenny表示一天排十小時,連吃飯都手震,Steven則謂跳到死也要跳,還要比Kenny練多兩小時。
採訪:楊潔雯、卓美娟
攝影:林德雄、葉君海