短線遊：<br>重修吐露港單車徑路闊好踩

短線遊：
重修吐露港單車徑路闊好踩

12月，天氣仍未冷，踏單車絕對是好時機，提議沙田直踩入大埔，眾人聽罷即大潑冷水：「路又窄，人又多，有乜好踩呀？」「大埔人」Fion獨排眾議：「近幾個月政府重修過吐露港單車徑，路面擴闊咗，環境綠化晒，同以前沙塵滾滾好大分別，信我啦！」好，既然有地膽拍心口保證，即管信一次。

記者：尹珊珊　攝影：陳陶鈞
模特兒：Fion、Connie（D8）

大埔海濱公園賞花海

中午一時，眾人在大埔墟火車站集合，「大埔人」Fion率領我們到運頭街租單車，原因：「運頭街勝在近火車站，又有幾檔單車行，唔啱揀到啱，好方便。」出運頭街，果真有數間單車行，「呢檔多車揀啲喎！」、「呢檔只可以喺大圍交車，唔順路喎！」商量片刻，扑鎚選定其中一間單車行，入內，老闆迎面招呼，悉心替我們揀選合適戰車：「記住試吓個煞掣，Check埋條胎夠唔夠氣。」選定心水戰車，正式出發。
Fion身為地膽，首領一職不作他選：「入吐露港前，先兜番轉大埔海濱公園，包你哋話靚。」依路標而行，公園人頭湧湧，信步蹓躂，眼前突出現一片色彩斑斕的花海，Fion興沖沖走到雀尾花、矮牽牛、金苞花、一串紅、百日菊等花圃，擺Pose拍照留念：「無介紹錯啩，呢度係影婚紗相熱點㖭呀，再帶你哋去多個好地方喇！」驅車上路，過元洲仔公園，見一廟宇隱藏車路旁，「呢個係大王爺廟，我老媽子話平日好多人來參拜，保平安㗎。」我們入廟拜神，祈求今日一行順順利利。

■以前單車徑沙塵滾滾，與馬路近在咫呎，食塵都食到飽。

■令人讚歎的浪漫花海，確實是拍攝沙龍照的勝地。

■大王爺廟香火鼎盛，路經時不妨入廟小休。

路面闊落環境綠化

嘗過頭盤，正式向吐露港單車徑進發，Fion沿路介紹：「全條單車徑最靚一段，路面加闊3倍，加咗隔音板同欄杆，以前邊有行人路？係咪安全好多呀？」所言非虛，眼前的單車徑明顯較以往闊落，重新鋪整無碎石，大大減低與對頭車相撞的危險，海旁又加設防撞欄，不用怕連人帶車滾落海，Connie與大隻攝影師即時附和：「N年未踩過吐露港，估唔到條單車徑靚咗咁多！」吐露港美景相伴，加上路旁新種的綠油油植物，眾人賴在石櫈上觀景看白鷺，幾乎捨不得走。

■坐在臨海亂石觀景，幾乎是所有遊人的指定動作。

科學園率先睇

高速向馬料水方向進發，由於沿岸正進行工程，景致無疑打折扣，猶幸未致沙塵滾滾，Fion再次充當導遊：「呢度起緊科學園，第一期已經落成，叫做比以前好少少，無飛沙走石咁恐怖。」視野瞬間由海景變工地，眾人大呼無癮，惟有急速飛馳，不過謹記行經地盤出入口時要提高警覺。經過一個又一個仿似越野障礙賽的彎位，不久已見科學園第一期聳立前方，玻璃幕外牆的高樓果然有氣勢。到達馬料水，時間比預期早，Connie提議：「咁耐無踩單車，對腳攰到好似唔係自己咁，唞唞先啦！」美少女叫到，我們也樂得在「肥陳」補給艇上小休一番。

■大大個警告牌提醒減慢速度，急彎轉窄路可避免炒車。

■科學園第一期已經完工，現時僅有一間快餐店營業。

沙田睇聖誕燈飾

離開馬料水，發力踏單車往沙田馬場，Fion回憶起過往的搞笑經歷：「試過有次踩近馬場嗰段林蔭小路，條路又貼住馬場喎，咁啱又有花王淋花喎，搞到我連人帶車成身濕晒，幾狼狽呀。」幸好這趟沒慘成落湯雞。開足Turbo入沙田，Connie即忍不住笑道：「嘩，唔使用眼睇，城門河陣味真係遠一遠都聞到。」接下路段筆直但狹窄，兼有大量狠勁單車少年在身邊逢車過車，要小心炒車；轉眼到達沙田市中心，兩美少女駐足一睹沙田區的聖誕燈飾，時近傍晚六時，天色開始轉暗，瀝源橋上的閃亮彩光，規模雖比不上尖東海旁的璀璨迷人，卻讓這次單車之旅更加圓滿。