下周五便是平安夜，組合2R籲少女們在平安夜要小心謹慎，更傳授其父教導的自保三招給各界少女防失身，包括避免飲酒、提防落藥、以及攜帶輕便手袋出夜街。至於聖誕願望，2R表示希望港府能徹底打擊非法下載。
組合2R下周五要在工作中度過平安夜，日前Rosanne和Race接受本報訪問時，透露以前在星洲居住時，每年聖誕都與家人度過，2R說：「冇得選擇，因為過年過節一定要看舖（其父開設曬相店）。」
對於平安夜被稱為失身夜，Rosanne說：「係會放縱玩，雖然我哋兩個都好大膽，不過好驚死。」2R爹哋一向對兩姊妹管教甚嚴，故早在她們來港前已教授她們要好好保護自己，Race更將父親所教的三招自保方法公開。
Race說：「去夜店千祈唔好飲酒，因為我酒量好淺，飲少少都會暈低；去洗手間或者行開嗰陣，返嚟就要叫過另外一杯嘢飲，以防被人落咗啲藥；出街要孭個細細個嘅手袋仔，唔好用手拎，有乜事就即刻走。我覺得點玩都好，一定要保護自己，唔好無端端失身，做任何事之前，諗吓爹哋媽咪先。」
問到2R有何聖誕願望？她們說：「打擊香港啲download！希望香港政府可以捉到非法download啲人，其實新加坡嘅人更加識得download，但啲人喺網上嘅用戶登記，政府係可以check到，一首歌要罰成四千幾蚊坡紙（約一萬八千九百元港幣），所以都冇人敢download，香港都可以試吓呢個方法。」
此外，樂壇四大頒獎禮將至，2R表示會以平常心面對，二人異口同聲說：「就算冇獎攞，都會去晒四個頒獎禮，會去支持，人哋唱咗咁多年歌至有獎攞，我哋自己都未受夠苦，所以會繼續努力。」
採訪：朱倬誼
攝影：林德雄
髮型：Tavin（HairCulture）
服裝：Bauhaus
場地：Pariscafe
