某日收到同事M電郵，內有日本雜誌裏一隻隻似TeddyBear的狗，即時驚為天人，大叫「Kawaii」，自此一直在尋找此類狗種。是比熊嗎？比熊只有白色的。是魔天使嗎？魔天使的毛是燙了「負離子」的。
又某日收到同事J電郵，一頭黑色的「TeddyBear」向着我微笑。「熊」的真正身份是玩具貴婦狗（ToyPoodle）！
記者：邵超
攝影：楊錦文
鳴謝：Dogotel（27110019）
總覺得貴婦狗全身有很多波波：頭部至耳仔就好像戴上一頂俄羅斯帽，身軀和尾巴都戴上毛毛絨球，四肢更像穿上毛茸茸的滾軸，看上去就是很有錢的樣子，不過應該沒有人會對牠嗌「打劫！」玩具貴婦狗啫喱仔，今次完全打破小記心目中的貴婦狗形象。
似熊非熊
「隻熊仔識郁㗎！」看到啫喱仔的實體，終於明白當日又一城某小朋友驚訝的原因，不過主人Jackaline就覺得啼笑皆非。採訪當日，啫喱仔一如過往，每次出現均引來「好得意啊！」「係咪樹熊嚟㗎！」諸如此類的讚歎聲。
啫喱仔剛剛剪完髮，站立時看上去激似一隻樹熊。聽到啫喱仔似樹熊，Jackaline又要抱怨了！不過她的朋友都這樣認為。啫喱仔注定擺脫不了做「熊」的命運，只要不是「狗熊」便成了。
啫喱仔檔案
名字來源：打開雪櫃見到啫喱
年齡：7歲5個月
性別：雄
品種：玩具貴婦狗（ToyPoodle）
出生地點：加拿大
性格：活潑、貪玩、為食
專長：嗲主人買玩具、HandHand、請請、RollOver、Stand等
價錢：900加幣（當年對5.5）
我在加拿大的日子
力保熊樣
97年出世的啫喱仔，其實已經是一位「阿叔」輩了。牠出生時全黑鬈毛，弄得一心想到寵物店買龍貓的Jackaline改變初衷，買下似足冷球的牠。現時啫喱仔毛色夾雜白毛，遠看像灰色，由冷球蛻變成「樹熊」。
啫喱仔五歲時第一次搭飛機，持着一張約600加幣的飛機票，躺在行李艙的私家膠籠裏從加拿大飛返香港。當時的牠身材沒有現在般圓滾滾。「我一定唔會俾佢剪到好似標準貴婦狗咁樣，塊面同四隻腳剃晒毛。返到香港我鍾意Dogotel個日本美容師的手勢，剪得佢好靚仔。因為加拿大好興將佢手手腳腳的毛剪得好薄，望落去好瘦，唔靚！有一次重將啫喱仔剪到成隻米奇老鼠咁，佢好唔鍾意，剪完後無晒心機。」要保持「熊」樣，啫喱仔要兩個月「大修」一次，最滿意是可以將耳仔和尾巴剪成球形，美容師說並非每隻玩具貴婦犬可以的呢！天生麗質難自棄，同狗唔同毛。
愛偷早餐
Jackaline返港後認識了Dogotel的老闆娘三姊妹，其中二家姐Sisie養了一隻玩具貴婦狗女Yogi（８個月）和迷你貴婦狗仔TedTed（２歲）。每次Sisie問店裏的日本美容師：「佢哋可以剪得像啫喱仔般嗎？」日本美容師雙手打個交叉，美夢破碎。
「好開心識到她們，有一次帶啫喱仔去美容店，惹到金錢癬，某獸醫介紹我嚟呢度剪毛，於是識咗佢哋。佢哋好錫狗唔會打狗，而地方大，所以得閒就會帶啫喱仔落嚟玩。」貪玩的啫喱仔不喜歡吠人（Jackaline某朋友例外，原因不明），年紀不輕仍然鍾意玩玩具。「佢好識得分我和佢的玩具，最叻係打開我的手袋偷早餐食、周圍PP（瀨尿）同扮Cutie。」結果偷食的刑罰是要食減肥糧！不過啫喱仔臨老面對另一個嚴峻考驗，就是Jackaline密謀買多一隻玩具貴婦狗，未睇中哪隻狗卻已改好名，啫喱仔會否呷「布甸」醋，留待下回分解。
聖誕花生騷（AllfromDogotel）
貴婦狗小檔案
貴婦狗按體形分標準（StandardPoodle，超過15吋）、迷你（MiniaturePoodle，最高10至15吋）和玩具（ToyPoodle，最高10吋）三大種類，起初是馬戲團的成員之一，其雍容華貴的氣質在法國大受歡迎。雖然法國貴婦狗的形象深入民心，但其實此狗種源自德國。通常參展的貴婦狗都會剃去臉部和四肢部份毛髮，身體呈四方形。由於部份狗主，特別是日本則流行未經剃毛的「髮型」，於是似熊的狗便是由此誕生。
