領匯（2382）事件繼續困擾人心，終院一有判決，恒指曾經跌過119點。恒指埋單只係唔見32點，一啲藍籌中段急跌之時，相關C輪跌幅冇跟到足，呢啲情況都算係好現象。
和黃C輪3561：交投最旺嘅C輪，係若干恒指、和黃（013）同滙控（005）嘅C輪。和黃C輪9663有4.01億份易手，佔發行量超過一半，正股跌0.25元，隻輪跌3.1%，收22.2仙。隻輪槓桿率31.5倍，爆炸力好似好勁，但要留意有效槓桿率只係12.5倍，而溢價7.3%，本來唔算高，但明年2月中到期，過埋下個禮拜，到期日變咗「下個月」，揸隻輪易輸溢價。溢價逐個百分點咁縮，除非正股好生性，否則輸多過贏。
和黃C輪條件最好嘅係3561，明年6月到期，輪價57仙，溢價5.3%，槓桿率12.3倍（有效7倍），引伸波幅27.1%，有機會見平貨，買些少博反彈。
長實C輪4460：長實C輪2249，條件唔錯，明年2月中到期，輪價91仙，溢價0.8%，槓桿率8.1倍（有效7.1倍），引伸波幅27.6%，不過交投太疏，全日得2.1球，用嚟炒唔係咁啱。
用嚟炒，要畀高啲溢價，揀4460，隻輪明年3月到期，輪價44仙，溢價3.9%，槓桿率16.7倍（有效9.9倍），引伸波幅25.7%。
國壽C輪4492：國壽（2628）升0.10元，末日C輪2143升20%，4492升7.9%。國壽好反覆，有機會再回落時，低位博反彈，吼4492，明年3月中到期，輪價34仙，溢價5.2%，槓桿率16.5倍（有效9.2倍），引伸波幅28.2%。
章盛