終審法院表明無權縮短領匯（2382）案上訴期限，駁回房委會縮短上訴期限申請，呢個裁決相當合理，但同時意味法律程序重有排搞，領匯應不能在下周一上午8:00前掃除所有上市風險，能否上市就要視乎房委會是否夠膽冒訴訟風險。
呢單官司，除非盧婆婆除咗「以慢打快28式」之外，尚有其他更勁的絕招，否則房委會應如孫公所講絕對贏硬。但房委會現時的態度相當保留，阿虎唔知佢驚咩，其實有邊單上市計劃是絕對不存在訴訟風險呢？香港的上市監管是以披露為本，亦即願者上釣，大不了就向認購者提供原價回購保證，何必忍受被技術性擊倒之辱呢？
港股近期表現，好明顯受領匯能否上市的消息左右，港股噚日一度跌逾百點，但最後企穩，收報13992，跌32點，成交196.61億元。
賭業股繼續各自各精采，事先張揚話要抽水的邁特科技（1031）噚日停牌，配股集資5.4億元，主要是用作支付澳門君怡酒店。
嘉華建材（027）尾市八面威風，勁升29.77%至4.25元收市，成交高達4.34億元。市場傳出此股將獲呂志和注入澳門銀河星際酒店連200張賭枱的60%權益，變相將賭業上市，傳聞講到真嘅一樣，不妨留意。母公司嘉華國際（173）股價亦水漲船高，升7%至2.075元，成交達9039萬元。
中大娛樂（8167）噚日持續反彈，大升86%。由於此股由0.80元跌落嚟，最低見3.2仙，即使現在反彈至8仙，仍較出事前低約90%，吸引唔少散戶博反彈。公司話兩名股東共7000萬股被盜，現在有關股份已交予高院，亦即是有7000萬股被凍結，令中大娛樂股貨源大減，更加好炒。
阿虎