往事並不如煙，二○○四年對於八方同一眾傳媒弟兄來講，並唔係眨吓眼就過咁輕鬆。呢一年，有記者喺深圳採訪俾人兇，有記者拍攝學生請願俾人趕，有記者報道法庭新聞俾人拉，又有記者做得好好哋俾人炒。如果大家問八方二○○四最轟動嘅新聞係乜，八方一時間講唔出，但係問到二○○四年十大最霉最黑仔職業係乜，除咗衞生福利及食物局局長之外，記者就必佔一席。
十居其九唔係好嘢
收到香港電台傳真過嚟嘅「傳媒春秋－十大傳媒新聞選舉」廣告，邀請市民喺三十單同傳媒有關嘅二○○四大事當中，選出十大新聞。呢啲新聞，十居其九都唔係好嘢，除咗同記者有關之外，有好幾單都係娛樂界嘅大件事，包括鬼才黃霑去世，吳浩康、周永恆藏毒同應采兒涉嫌藏毒，《金枝慾孽》大收旺場，同埋港產片告急等等。
最近有個外國大學調查話睇得電視新聞多會搞到觀眾情緒低落，如果大家想聖誕節普天同慶高高興興嘅話，八方就勸大家最好唔好競猜呢個十大傳媒新聞嘞。睇吓個候選新聞名單，先有商台三大名嘴封咪，又有無綫新聞部同工程部大裁員，再嚟老廉扮錦衣衞大搜報館，真係愈睇愈沮喪。
傳真︰2623-9278
電郵︰