昨日正式開鑼嘅亞洲遊戲展2004（AGS），可算係歷屆最具睇頭，皆因SCEH展館Set咗足足30部PSP喺度，以及有香港賽道嘅《GT4》，供入場機迷率先試玩。一軟一硬同樣咁夠號召力，加埋多款未推出大作一樣有得玩，好多機迷?非機迷都欲參與咁熱鬧嘅盛事，搞到今年排隊等入場人數，比過往兩年重要多，矚目程度差不多可媲美日本嘅TGS。
記者：徐影龍 攝影：陳偉強
今年香港機迷認真威，事關係全球第三個城市獲得公開試玩PSP（其餘兩者為幕張TGS及洛杉磯E3），比台灣及新加坡重要早。上星期水貨PSP陸續到港，貨少關係炒到上五千幾蚊，人氣度非常旺盛，好多機迷都抱住親手一試打機手感，以及親眼一睹4.3"靚芒魅力嘅心態而入場。結果一如所料，PSP展館係最多機迷圍觀及排長龍等試玩，粗略一數起碼超過二百人！
咁多人搶試PSP嘅原因，除咗PSP規格及表現強勁外，$1,500港紙定價亦係主要吸引力。SCEH同日宣布有關行貨PSP嘅消息，雖然售價始終未定，不過已定喺2005年春季登場！
亞洲遊戲展2004
日期：今日至12月19日(日)
時間：上午10時至晚上8時
(19日下午5時閉幕)
地點：灣仔會議展覽中心展覽廳一號
入場費：$25
8成機迷揸《蘋果》入場
《蘋果》一連兩日刊登咗《GT4蘋果盃》及《高達VSZ高達蘋果盃》參加表格，好多高手機迷都爭相報名參賽，不過非機迷亦睇中當中嘅四大讀者着數印花，試玩勁Game唔使排長龍，所以大會尚未開放時，已見到過百名等入場人士，差不多有8成人，都手揸《蘋果》消磨時間。筆者採訪完畢回程時，特意昅吓灣仔嘅報攤同便利店，《蘋果》早已沽清！
靚女教打PSP
從日本運嚟幾十部PSP唔算威，重要學足日本AGS咁，搵一班靚靚ShowGirl做PSP大使，一人跟身一部PSP，俾入場人士試玩之餘，重曉得教埋你打機㖭！搞到更多人排隊等玩PSP，而且「有幸」入到PSP展館嘅，都借啲意唔玩擺喺試玩座上嘅PSP，而要搵姐姐教打機！
至於供試玩嘅PSP遊戲，種類比想像中重要多，除咗之前玩過多次嘅《RidgeRacers》同《全民高爾夫》，重有SONY招牌TORO貓擔演嘅《到那裏也一起》、《嗶波猴》、《英雄傳說》等Games，不過大部份都係智力、育成等較靜態嘅類型，要感受PSP真正威力，強烈推薦試玩賽車Game《RidgeRacers》！
PSP勁Game搶先睇
《全民高爾夫》
喺PS2上相當受歡迎嘅高爾夫球Game，移植到PSP上表現亦毫不遜色，豐富鮮豔嘅用色，以及全3D運算嘅草地背景，令人玩起上嚟都好過癮，其細微嘅設定，亦令人有種值得花時間研究嘅吸引力。
《ARMORERCORE》
家用機上玩機械人動作類型，移植到PSP改頭換面為育成玩法，出擊前Set好晒「手手腳腳」，之後電腦就會幫你戰鬥，玩家齋睇精采嘅戰鬥場面。
《英雄傳說》
PSP初期大部份係賽車、智力類嘅Game，好彩喺AGS見到有款極襟煲嘅RPG《英雄傳說》。精細嘅畫面及戰鬥系統，相當之具吸引力。
《KOLLON》
基本上都係「同色消退」大原則，有趣地方係跌咗落嚟嘅方塊，仍可自由隨意轉動，夾番上面嘅顏色，可輕易做出連鎖Combo，爽快度頗高嘅Puzzle遊戲。
狂玩《GT4》尖嘴賽道
PS2Games方面，最矚目都係等了又等嘅《GT4》，而喺《GT4》展館內好搶眼地擺咗部大發嘅真車喺度，旁邊圍住6部《GT4》車架，俾機迷連線對戰或單機玩之用，人氣度跟PSP展館不遑多讓。香港人等到頸都長恨玩《GT4》，皆因好多機迷都相當期待一試尖沙嘴嘅賽道，親身感受吓條彌敦道做得似唔似，又或一試喺星光大道上片車衝出太空館嘅超現實感！睇番機迷落場砌尖嘴賽道時，起初真係俾佢超窄路面及大量90O彎考起，炒車聲此起彼落，個個都話好難揸！喺後面排緊隊嘅人有暇望真條尖嘴賽道，都不禁大嗌：「嘩，都幾似喎！」而且全部都好醒，昅實賽道嘅急彎黑點、睇吓邊架車最啱落場砌，所以之後試玩嘅人都掌握到煞車時間同過彎弧度，揸得有板有眼得多！
會郁駕駛艙似真車
體感駕駛艙再次重臨香港，三合一畫面令到駕駛視野更闊，加埋成個駕駛艙會左搖右擺，比坐定定玩嘅車架更有揸真車嘅感受！而上年只係玩到《GT4序章》，今日就玩到正章版，兼且可揀埋香港條尖嘴賽道，吸引力比上年更大！雖然最長排隊人龍超過70人，不過另一邊手持《蘋果》印花嘅專隊就快得多，大概排二十幾人就有得玩。
未見街勁Game試玩
《太鼓之達人5》
特別多小朋友排隊爭玩嘅一個攤位，現場Set咗共六部試玩機座，又有個超巨屏幕喺頭頂，俾你一邊玩一邊顯示你嘅打鼓成績，小朋友亦玩得相當之投入同緊張。
《BIOHAZARD4》
2005年初超大作《BIOHAZARD4》，最快喺1月11日先推出美版，而日版就要到1月27日派貨。CAPCOM展館內以《BIOHAZARD4》試玩為主，兩部機都吸引到二十幾人排隊等玩。
AGS花絮
