金像影后寧舍搶手
妮歌、查理絲爭做廣告女王

來自南非嘅女星查理絲泰朗（CharlizeTheron）自從升格做金像影后之後聲價十倍，早前重俾名牌ChristianDior睇中做香水代言人；而上屆金像影后妮歌潔曼（NicoleKidman）繼做咗Chanel代言人後，又俾名表Omega垂青。佢兩個嘅全新廣告重喺雜誌同期曝光，實行鬥個你死我活。

提高產品格調
查理絲早前以約四千萬港紙為Dior嘅J'adore香水拍廣告，佢喺廣告度着住套金光閃閃嘅晚裝，流露出一份成熟美。
據Dior方面話，佢哋睇中查理絲高貴得嚟又青春嘅形象，希望佢可以幫呢隻香水吸納一班二十至三十五歲嘅女士。
而不嬲都好受廣告商歡迎嘅妮歌，今次又以天價為Omega嘅金表賣廣告，因為好多後生女嫌金表俗氣，所以廣告商特登搵妮歌嚟轉吓個形象。妮歌喺廣告裏面展現出輕鬆嘅一面，佢重笑到咿起晒棚牙，真係難得一見。

親自設計手袋
另一邊廂，美國黑人女歌手BeyonceKnowles雖然冇兩位影后咁威，不過佢深明密食當三番嘅道理，早前佢去日本嗰陣，就幫配飾商SamanthaThavasa拍咗輯全新廣告，據講Beyonce重親自設計咗一批手袋同首飾，主攻後生女市場。