馬主H嘅公司七年前買咗一部叫做先進嘅影印機，影印機一向運作良好，但過咗五年之後，影印機代理商話部機已經過時，零件難找，每年保養費要收四千元。明年進入第八年，代理商拒絕再保養。馬主H心諗部機如果跪低，都會幾麻煩，代理商嘅營業代表乘機上門游說，奉上優惠，話明原機收回，新機打折，贈送免費保養五年，條件甚為吸引，一㩒計數機，就知道制得過。於是好快就成交。
營業代表（俗稱Sales）又講：「付帳方法，任君選擇，公司支票啦、現金啦，我哋甚至為客人設想，幫佢哋儲蓄mileage，可以用個人信用卡簽帳。」咦，架機淨價賣兩萬幾銀，大消費項目噃，簽卡可以攞番成三千哩，有乜唔好？原來代理商摸透客戶心理，徇眾要求，順應市場需要，呢間公司抵讚。
簽卡之後兩日，新機立即送到，搬機工人話：「我哋送新機，收舊機啫，要等裝機師傅嚟裝機。」黃昏時間，裝機師傅殺到，點知裝嚟裝去，新機唔用得。於是第二朝晨早再嚟，搞成個幾兩個鐘頭，師傅投晒降，猛咁道歉，禮貌好到極。師傅話呢部機唔掂，聽日送過另一部新機嚟，再搞過。
馬主H為之咕咕聲，因為舊機已搬走，新機唔掂，要影印文件，點搞？如果係律師樓買機，而律師樓用影印機用得好頻繁，咪俾呢間代理商玩死？做乜代理商送部新機嚟交貨，竟然送咗部死火機嚟，阻住人客嘅正常運作？
呢間公司嘅高層管理人員，應該學吓劉德華嘅廣告名言：今時今日咁嘅服務態度，要檢討吓。