唔知係金沙喺美國炒得勁，抑或係要慶祝澳門回歸，濠江賭業股隻隻炒到失控咁滯，真係睇到小初眼定定。
好似唔知會唔會注入賭業的嘉華建材（027）勁升29.77％，收4.25元，想話搞賭但又想做埋食品生意的廣益國際（530）再升26.32％，收4.8仙。至於真係有賭業的龍頭新濠國際（200）升7.19％，收15.65元。旗下希臘神話賭場即將開幕的奧瑪仕（959）亦升5.95％，收2.225元，成交2.65億元。
經紀陳話，本來佢對一啲包裝做濠江賭業股的股仔能否散貨存有疑問，但家陣睇到咁大成交，今次炒家應該發大達，不過散戶就真係要小心，玩還玩，要早啲做好跳車準備。
這邊廂濠江賭業股炒到㷫烚烚，那邊廂傳聞想做上的變靚D（8079）卻急跌22.5％，收3.1仙。市場即刻謠言四起。經紀陳話，佢覺得其中一個原因，就係剛公布業績的大凌集團（211），有意派發多隻股份作股息，其中一隻就係變靚D。
大凌持有變靚D股份數量唔細，今次如果佢當股息派出街，無疑令變靚D街貨數量大增，唔排除有人當堂嚇親。
慕容小初