自由行帶動地舖需求，工業區嘅地廠亦唔例外，美記估計今年地廠成交有一百六十三宗，較去年勁升五成三，估計明年成交量重有兩成升幅，價錢將升三成，分分鐘好過投資寫字樓同住宅。
美記話舖市勁升，帶挈埋地廠，尤其交通方便嘅市區地廠，人流有保證，但租金比地舖平一大截，愈來愈多食肆同零售店舖進駐工廠區，其中紅磡民裕街和民樂街交界，就有超過六成地廠，由金飾店租用或者自置，主要作零售用途，針對內地自由行客。
地廠由工業轉做零售用途，要向政府補地價，有時由租客畀，當然一般情況補埋地價，租地廠成本仍比地舖平好多。個別地廠升值力強，好似觀塘南華工業大廈千一呎地廠，上周以千六萬易手，業主唔使半年已經賺咗四百萬，升值三成三。
臨近年尾樓市氣氛無之前咁熾熱，不過，代理喺二手市場仍然密密做，無損今個月嘅收入。中原執行董事陳永傑（圖二）話，今個月截至十六號營業額都有八千萬，比起上個月同期多咗八個巴仙，淨係住宅佔咗七千萬，其中有八十一個巴仙係二手。佢好有信心咁講，今個月可以同上個月一億七千萬條數睇齊。
另外，美聯物業沙田大埔區嘅營業額，都係不減反增，美聯鄧天勇話，淨係上半個月，營業額已經有千七萬，等於成個十一月嘅數。原來全靠火炭晉名峰帶挈。
本報每日都會刊登一啲由代理畀嘅二手成交紀錄，日前出咗個北角半山賽西湖大廈五座中層A室，一千四百九十呎，以一千一百五十萬成交，第日有個業主打電話畀蘭西，話佢啱啱以一千零九十八萬賣出五座十三樓A單位，想知道本報所載成交係唔係佢個單位。
問番有關代理行，負責人話唔係十三樓，而係五座十五樓，當晚再致電蘭西，話個成交係十五樓，不過唔係五座，但就唔方便講係邊一座，只係堅持有個單位以一千一百五十萬成交，到最後公關再致電澄清，所報中層單位確實係十三樓，成交價報錯咗，由始至終都冇一宗買賣成交價係一千一百五十萬元。
代理為咗見報，亂咁提供資料，蘭西奉勸買賣雙方，凡事要小心查證，總之最好有證據至信，以免中招。
新盤設有會所差不多已成例牌，發展商策劃項目時，絞盡腦汁引入新設施。新地明年主打新盤上水皇府山，就為住戶提供全港首創雷射射擊遊戲。聽聞，呢個遊戲專程喺外國買番嚟，應該幾刺激。下個月九號，發展商就舉行試槍推介會，等大家見識吓。發展商喺樓市同經濟預測方面嘅眼光就考得多，玩射擊就第一次。
樓市順景，發展商賣樓大豐收，聽講今年連番出擊嘅南豐集團地產部經理麥一擎，剛剛升做集團董事兼地產部總經理，可喜可賀。今年南豐開賣嘅樓盤，除近期同永泰亞洲合作嘅火炭晉名峰外，重有將軍澳廣場。集團又趁樓市復甦，積極吸納地皮，好似市建局大角嘴櫻桃街項目，同埋何文田天光道地王，南豐都有份參與。
電郵地址：