領匯（2382）事件令人領會到乜嘢人係某種動物（中文字，8劃）。上經紀行一轉，聽到唔少問候人家祖宗十八代嘅聲音。特首與高官，都有嘢講。香港變咗乜嘢世界？有錢佬唔係大晒，但同樣冇錢嘅亦唔應該大晒。
恒指C輪4478：恒指C輪4478成交金額3.58億元，同類輪4539亦有2.09億元。
兩隻輪都係明年3月底夠鐘，4478輪價20.4仙，溢價1.8%，槓桿率16倍（有效10.7倍），引伸波幅19.3%。4539輪價14.5仙，溢價3.78%，槓桿率25.8倍（有效13.1倍），引伸波幅19.1%。炒恒指C輪，4478靚過4539，槓桿率輸蝕啲，但溢價慳番1.9個百分點，代表慳番恒指266點。着數還着數，賭4478唔係贏梗，一個「阿婆」，就可以搞到揸家反肚。
信德C輪3638：信德（242）由7.25元彈上8.15元，隻Call輪3638由22.3仙飛上52仙，升幅133%，成交量由4.8球增至58.4球。
隻輪由麥記發行，面世6日，明年10月到期，溢價62%，槓桿率1.6倍（有效得1.3倍），引伸波幅196%。有「概念」嘅股份，溢價應該高到邊度好難講，但咁嘅有效槓桿率與引伸波幅，你買埋我份，咪亂嚟。
和黃P輪4470：和黃（013）跌1.25元，P輪4470升19%，收報4.4仙。重有3個月命，溢價18.1%，槓桿率160倍（有效得13.7倍），引伸波幅30.4%。仙輪當刀仔，用嚟鋸大樹，但好可能樹未鋸低，刀仔先斷。
章盛