關心妍（Jade）日前自掏腰包購買糖果禮物，前往協康會幼兒中心探訪，給六十位分別患上自閉症和身體發展遲緩的小朋友大派聖誕禮物，小朋友十分開心，場面溫馨。
關心妍日前自掏腰包購買大批糖果禮物，趁着聖誕前夕，前往協康會的灣仔幼兒中心探訪。當日Jade大清早已出發到達中心，向在場的六十位幼兒大派聖誕禮物，又與小朋友一同玩遊戲。
在該幼兒中心學習及受訓的六十名小朋友，分別患上自閉症、身體弱能及發展遲緩等毛病，當日小朋友見有姐姐到場與他們玩耍，大多表現得很高興。Jade對小朋亦甚具愛心及耐性，她細心地與小孩一同製作聖誕卡，又教他們搽潤膚露及潤唇膏，當中有名男孩更主動為Jade塗潤唇膏，又與她親親臉頰，場面溫馨。
不過，當Jade向一名患上自閉症的男孩送上禮物時，對方沒多大反應，但Jade仍耐心地逗他。其後她又大派禮物，與四歲女童霖霖一同玩耍，玩跳彈床、玩具車、滑梯和搖搖板。
探訪結束後，Jade感觸地說：「我係第一次探訪呢啲小朋友，感覺係做到一個正常嘅小朋友已經好幸福。家長希望仔女成材，但讀書唔叻就迫，雖然小朋友未必好乖，但有個正常嘅就已經好夠，試諗吓生到個有少少缺陷嘅，就一生一世㗎啦，你重要用多一百倍嘅愛心同耐性去照顧佢。」
Jade更大讚照顧這些幼兒的姑娘十分偉大，她說：「我睇到佢哋個個都好有愛心，唔係一份普通工咁簡單，要有無限嘅愛心，真係好偉大。」Jade又表示希望圈中人能付出多一點時間回饋社會，她說：「有時做呢行唔好話為賺到錢就以為自己好紅，都要去幫吓人，用一啲正面嘢去影響其他人，鍾意你嘅歌迷見到你咁做，可能佢哋都會去做。你真心去做一件事，啲人係會感受到，睇多啲嘢對自己亦都有啟發。」
採訪、攝影：朱倬誼
