T老總請客，聖誕前以示友好；臨到年尾，有好多餐要食，酒店餐廳，生意真係唔錯，何況大公司陸續宣布加薪㖭。滙豐宣布加薪百分之四點五，好多人歡喜，因為滙豐係龍頭大哥，有指標性作用也。但唔好高興得太早，經濟G話佢三四年來都冇人工加過，明年亦唔肯定有。滙豐加薪百分之四點五，其實係講：總僱員成本（staffcost）可以增加百分之四點五，但唔係一刀切，有人加薪，有人繼續凍薪，睇表現評估而已。
T老總唔講加薪，只講成本上漲。煤價一年內上升百分之一百，的確令人頭痛。T老總具數十年工作經驗，乜風浪怪事都見過，佢話昔年中環四大行之中，有一位董事C，權傾一時，每次與別人做生意，必定睇相、睇掌紋。某次T老總（當時未係老總）奉命與董事C傾生意，董事C只係望住佢塊面，都唔知有冇聽入耳。T老總陳詞完畢，董事C要同佢握手，互握之下，董事C係咁又摸又㩒凡分幾鐘，之後就話：「好，一於有得傾。」T老總旁邊有一位朋友，想提出另一建議，董事C望多佢兩眼，默然不語，話第日先至再傾。告退之後，T老總收到董事C電話：「阿T，你位老友嘅太太會有車禍，請佢小心。」T老總嚇咗一跳，唔知點講好。幾個月後，朋友與太太到歐洲旅行，太太竟然真係因車禍身亡。此位中環商界奇人，早已過身。T老總迄今未再見過異人。
異人之術，有真有假。最近閱報，得知一位年輕女商人申請破產，甚為感慨，因為女商人之父幾年前已經破產，十年前佢兩父女「接見」左丁山，意氣風發，係威係勢。其父好算命，高級夥計全部俾佢算過，兼且自言拜佛崇佛，一副高人面孔。如今安在哉，算得咁盡，乜都算人，點解算唔到自己父女破產？