梅雪詩（阿嗲）近日一償多年心願，推出首張個人折子戲DVD。從事粵劇工作多年的阿嗲，雖然江湖地位早已獲得認同，但原來她仍每星期上粵劇課，吸收更多粵劇上的知識，不過她卻不敢向師傅仙姐討教。
從事粵劇演出多年的梅雪詩，近日終有機會一償心願，推出她入行以來首張個人粵劇DVD《紅樓雪影夢成詩》。阿嗲日前接受記者電話訪問時喜孜孜地說：「其實咁耐以嚟，啲戲迷都成日問我幾時出DVD，我自己一路都有咁嘅心願，所以我都應承佢哋話會出，可惜一路都係開空頭支票，因為工作忙而出唔到，所以今次對我嚟講，真係還咗一個心願。」
阿嗲表示，這張DVD將以豪華限量版推出，只售一千張，每張約售三百八十多元，預計在聖誕期間發售，至於內裏收錄的折子戲，包括有《紅樓夢》之「焚稿歸天」和「葬花」等等，阿嗲說：「『焚稿歸天』嘅折子戲，其實係九五年我喺《歡樂滿東華》嘅演出片段，呢段戲係丘亞葵幫我拍，我好鍾意，拍得好靚，於是丘亞葵就同無綫買咗版權嚟出DVD。」
阿嗲從事粵劇工作多年，問她可有興趣嘗試拍劇或其他演藝工作的演出？阿嗲說：「我個人比較呆板啲，個心只喺粵劇度，其他嘢真係冇諗過。」醉心粵劇的阿嗲，雖然地位早已獲得肯定，但原來她沒一刻停止過學習，阿嗲說：「每星期我都會跟一啲粵劇老師學戲，粵劇呢種藝術，冇話學得晒。」問阿嗲何不向師傅白雪仙討教時，阿嗲笑說：「我哋好驚師傅，唔敢問佢，當然亦唔想騷擾師傅啦。」
採訪：戴彩煥
