地產大好友信和，今年二月用兩億幾，買入西半山干德道五十三號豪宅地皮，想參照新地寶珊道一號咁，起多層住宅，向政府申請放寬高度限制，今日城規會討論通唔通過。
豪宅最講景觀，樓起得愈高景就愈開揚，信和招租緊嘅中半山豪宅Bowen’sLookout就係好例子，當年同樣申請放寬高度限制，由一座矮屋重建高樓，至享有今日嘅無敵維港景，最高呎租去到六十蚊，直迫山頂。
不過，食髓知味嘅信和，今次可能遇阻，噚日蘭西接報，中西區區議員陳捷貴，發起附近居民，今日去城規會請願，最後城規會是否順應民意，否決信和申請，今午自有分曉。
信記較早時話，呢個地盤獲批建兩幢四層高豪宅，總樓面六萬五呎，樓面地價四千蚊呎，就算起唔到更高，𠵱家啲豪宅動輒過萬蚊呎，呢個盤都係賺硬。
今年樓市表現咁好，多間地產代理行都大豐收，利嘉閣預計，今年嘅營業額近五億，比舊年近三億增加六成幾，重係公司第二年賺錢。
臨近年尾，派完成績表，又係定立明年大計嘅時候，利嘉閣執行董事廖偉強話，仍然睇好明年樓市，目標會更加遠大，想跨進一大步，目標係將營業額提高至八億，比起今年足足多六成，重希望港島區表現最好，明年目標係二億八。
利嘉閣董事總經理何紹章話，打算明年再加碼三千萬，用作開舖同請人，努力擴充，分行目標一百三十間，營業員就加至千五人。
除咗要賺錢，廖偉強話，利嘉閣明年重有一個重要任務，就係要積極籌備上市，如果明年生意理想，就可以達到後年上市嘅目標。
2004年就快過去，新一年即將來臨，蘭西已經收到唔少公司送嚟嘅月曆，太古地產嘅都幾特別，共有十二幅喺港島東唔同角落影嘅相，可以睇到呢個多元化社區唔同面貌。原來每張相都隱藏住嗰個月份嘅數字，慢慢搵再加啲想像力就得嘞。
太古重附有一份新聞稿畀蘭西，原來佢哋精心策劃太古城同太古坊已逾二十年，對推動香港藝術文化不遺餘力。
九六年已經喺港島東引入「索拉奇藝坊」，二○○○年又有「巴西嘉年華及阿根廷節」等。舊年重獲「香港藝術發展獎」嘅「藝術贊助獎」金獎。太古對藝術嘅支持，似乎比入選西九嘅財團重早同熱心。
聖誕節就快到，周圍都充滿節日氣氛，今年樓市咁好景，代理行都特別多活動，祥益就為客戶送上一份心意，凡委託該行嘅客戶，都可以即時獲贈法國紅酒，或者「聖誕暖暖心意籃」。
呢個心意籃，裏面有法國紅酒、比利時朱古力、瑞士曲奇、茶包同糖果。
睇吓啲禮品，唔使估都知，收到嘅一定會好開心啦，祥益果然識搞好同街坊嘅長遠關係。
長實畢架山一號，年底前限量發售，噚日公布一個淨係畀美聯同港置玩嘅比賽，將兩間公司分為主區同外區，邊區首先促成三宗成交，就有三十萬獎金。
雖然兩間代理行屬同一集團，但係為咗凸顯主區隊同外區隊對壘嘅決心，兩邊分別派代表，着住武士裝，手執長矛、長劍，準備作戰姿態。佢哋嘅造型，有啲似木馬屠城入面嘅武士，步操出場時，都幾有氣勢。
𠵱家啲代理，唔單止要做生意，連造型都要諗埋，遲啲聖誕節，睇嚟都可以兼職，做埋表演。
電郵地址：
