楊千嬅最近同古天樂傳緋聞，佢嘅舊愛鄭中基亦唔輸蝕，同女子組合Twins嘅蔡卓妍（阿Sa）拍緊拖，佢哋早排拍攝喜劇《追擊八月十五》嗰時撻着咗，其後阿Sa返咗內地拍攝《情天大聖》期間同謝霆鋒傳過緋聞，不過阿Sa返咗香港之後，日日同鄭中基見面，似乎對呢段感情好認真。
阿Sa同鄭中基拍拖唔多避忌，所以有唔少人撞見過佢哋一齊去街，而呢對小情人嘅熱門蒲點，就係歐陽震華喺銅鑼灣耀華街開嘅酒吧OnionBistro，有人一星期見過佢哋兩次，而且重表現得好親密㖭；另外佢哋亦曾經俾人見到喺中環IFC商場一間餐廳入面撐枱腳。講開又講，阿Sa同鄭中基都係唱家班，自然唔少得成日會約埋去唱卡拉OK啦。
李婉華跟隨丈夫移民過咗加拿大溫哥華定居兩年，早排佢特別復出為當地華埠小姐選舉任主持，李婉華話生咗個女之後，體重一直維持喺一百五十磅，佢亦冇諗過要減肥，但係為咗今次演出，李婉華減到得番一百零九磅，佢老公都讚佢靚！𠵱家李婉華希望盡快再生個仔，等個女有個伴嘛。
張艾嘉噚日喺台灣為一間教育學院出任代言人，提到教育呢個問題，張艾嘉話佢囝囝奧斯卡好有文學天份，但數學就一塌胡塗，所以要請家庭教師惡補一番，張艾嘉又話自己從來唔會迫個仔讀死書，亦唔會體罰，佢激氣嗰陣最多都係打張枱喎。
薛凱琪今年都有唔少是非，最近有雜誌話佢份人囂張，薛凱琪所屬嘅華納唱片噚日發表聲明，話呢啲報道不盡不實，會保留法律追究權利，華納高層李仁佳重話：「其實薛凱琪同各大傳媒關係友好，今次係揑造事實，對公司、藝人都好唔公平。」
韓國男星宋承憲入軍營受訓已經差唔多一個月，前日佢寄咗一封信畀經理人公司，講吓佢嘅近況。宋承憲話起初唔多習慣營入面凡事依照命令嘅生活，不過其後已經開始適應，𠵱家佢六點起床十點瞓覺，過住有規律嘅生活。宋承憲亦感激fans寄信畀佢，不過就好擔心家中嘅父母，而宋承憲今個月二十四號結束訓練之後，就會正式開始軍人生活。
黃品源最近來港宣傳全新唱片《感謝情人》，佢話其中一首歌曲《情人》係有感而發寫畀自己嘅情人嘅，黃品源話：「那個情人便是我的老婆，她代表了我曾經有過的感情經歷。我試過感情失敗、失戀，但現在懂得愛現在的人。」
