領匯（2382）上市前景未明，港股噚日午後出現較大幅度調整，恒指曾一度跌過百點，但低位有承接力，尾市重上14000點大關，收14024，跌53點，成交219億元。期指收14038，高水14點。
大市雖不濟，濠賭股則威風八面，美國賭業集團金沙在紐約上市，股價大升，掀起賭股追捧熱潮。金沙上市價29美元，中段一度搶高到近50美元，收46.56美元，大升60.5%。
信德集團（242）一個禮拜前推介過，當時股價7.0元，噚日收8.15，單日上升0.9元，升幅12.4%，成交則大增到9246萬股，總值7.3億元，應係呢10年來嘅最高紀錄，動力咁強，且又突破前高位8.0元阻力，短線上升目標指向10.5元。
信德開始參與賭業嘅新途徑，原來收益好勁，另外亦有新料，今日再講多次。信德以15億元收購的南灣物業，樓面270萬方呎，其中2萬方呎租畀澳門博彩經營賭場，租金係以賭桌收益計算。賭場內將包括不少於180張賭桌，月租係以首60張賭桌賺取每月總收益之40%，及餘下賭桌賺取之每月總收益不少於30%。
一張賭桌一個月收益有多少？行內的共識數字係160萬元，然則信德一個月的收益又會有多少？
首60張賭桌一個月的收益係9600萬元，扣除博彩稅及其他開支約60%，實收3840萬元，信德佔40%係1536萬元。
餘下的120張賭桌1個月的收益係1.92億元，扣除稅項及開支後，實收7680萬元，信德佔30%係2304萬元。
單係租出賭場面積，信德一個月的收入就有3840萬元，一年有4.6億元，條數咁可觀，難怪基金一路㩒住係咁收集，早兩日話過，只要基金鬆手，信德就會飛升，噚日果然創出新高。
以金沙個價計，家下PE近40倍；若單以信德南灣賭場收益PE35倍計，已值161億元，信德噚日市值亦都係呢個數，至於信德其他投資例如持有澳門旅遊11.48%，相當於澳門賭場實際權益9.18%，條數重更加犀利，難怪大行買得咁積極，信德股價明年升上20元水平，亦有可能。
郭兆誠