英格蘭聯賽不嬲無歇冬，對於近年先後去皇馬發展嘅碧咸、奧雲同活基治嚟講就夠晒爽，可以歎假期；唔止咁，皇馬年尾一次過出半年薪水畀佢哋，簡直係最好嘅聖誕禮物。至於曼聯後衞軒斯今季雖然投身英超聯，但獲費爵爺批聖誕假畀佢，一樣咁爽。
唔講唔知，原來皇馬係每半年出晒六個月人工，所以碧咸聖誕節前可以一次過領三百萬鎊（約四千五百萬港元）薪水，而奧雲同活基治就分別袋二百萬鎊同埋一百八十萬鎊。
講時講，活基治加盟皇馬後因傷長唞，咁就白𢭃一百八十萬鎊，恨死隔籬。
曼聯阿根廷後衞軒斯係天主教徒，以往無論響阿根廷、法國同埋西班牙，都可以響聖誕節參加好多宗教節目；費爵爺眼見軒斯夏天踢完奧運歸隊都無乜唞過，一於賣過順水人情，好似上季放基斯坦奴大假咁等軒斯唞唞，呢個老細果然識做。
祖雲達斯將戰AC米蘭，備戰各師各法。繼AC副會長加里安尼出口術警告球證後，平時唔多嘢講嘅巴西龍門迪達，大讚對方門將保方，話成日喺對方身上學嘢，對方堪稱世界第一喎。迪達係真心讚對方，定送高帽順便畀啲壓力人呢？祖記球員近日就比較少出聲，冇你咁好氣。
據一個關於英超聯嘅調查顯示，車路士施亞係目前為止最穩陣嘅門將，平均每三個鐘零十一分鐘先失一球。車仔當日用成七百萬鎊買施亞返嚟，俾人笑儍仔，𠵱家施亞交足功課，總算幫車仔爭返口氣。話時話，如果施亞前面冇泰利同卡華奴頂住，唔知佢重有冇咁勁呢？
加盟唔到德甲柏林哈化嘅中國後衞鄭智現喺修咸頓試腳，表現唔錯，加上工作證方面唔成問題（近兩年幾乎出席晒中國所有比賽），故國內傳媒話佢好有機會加盟該支英超球會。孫繼海養緊傷，李鐵又重未出得番，我求大俠亦希望佢可簽得成修咸頓，等中國球員再次喺英超出現。
前英格蘭同阿仙奴中堅阿當斯最近再婚，同牛津大學畢業生兼家族經營威士忌生意嘅寶比結婚。阿當斯最近辭去韋甘比領隊職位而重返校園讀書，寶比咁有學識，應該可以幫到佢；但記得佢好耐之前有酗酒問題，希望佢唔會因為有免費酒飲而搞到自己再變成酒鬼嘞！