港股噚日受到領匯（2382）官司影響先升後回。本來市場預期盧婆婆最終不會上訴，即使上訴亦會敗訴，領匯最終可以在下周一上市。點知盧婆婆申請上訴但又缺席聆訊，重話無論判決如何都會上訴至終審法院，推翻高院縮短上訴期的決定，玩到房委會謝晒。領匯如期在下周一上市的機會渺茫，令恒指倒跌53點，收報14024，成交219.34億元。
領匯竟然有暗盤價，傳聞重係13.50元，即係話領匯認購人可賺24.65%，每手賺1335元，全數合計可賺53億元。若果領匯不能上市，則捧場客到口的「肥肉」將見財化水。
阿虎係散戶，享有3%折讓，3手料可賺4485元，呢筆錢足夠阿虎一家三口食一個好豐富嘅聖誕大餐，就算加埋團年飯都夠，都咪話唔肉痛。阿虎曾懷疑過13.50元暗盤價係咪堅料，但黑客話佢親自撮合過13元的成交，所以傳聞唔算誇張，買家主要憧憬領匯資產值及租值日後可提升。
阿虎覺得𠵱家搞到咁亂，領匯真係唔上好過上，反正阿虎一直都唔贊成港府出售有經常性收入的資產來解決短期財政問題。市場現時關注政治風險溢價上升，外資會否因領匯事件而撤出香港。
賭業集團金沙在美國掛牌上市，首日勁升60%，消息刺激信德（242）大升12.4%，成交逾7億元，位列第三大成交股份。原來市傳澳博見金沙炒到㷫烚烚，亦心思思想去美國納斯達克市場掛牌，信德間接持澳博約9%多股權，自然有藉口炒上。
其他濠賭股亦相當活躍，新濠（200）升14.5%，廣益（530）更勁升58.33%至0.038元，成交達1.33億元。
阿虎