鄭融將於明年的香港藝術節擔任表演嘉賓，她會翻唱一些周璇年代的懷舊國語歌曲，近日她已開始惡補國語及做運動練氣，務求做到最好。
鄭融將於明年的香港藝術節擔任表演嘉賓，坦言能夠做一些非商業性表演感到緊張，加上她表演的項目是唱一些懷舊國語歌曲，所以她要積極惡補國語。
鄭融說：「我諗到時係要翻唱一啲周璇年代嘅歌，雖然我自己都有學過幾年國語，不過唱國語歌嘅咬字一定要好清楚，所以我一定要加緊練好啲國語。」
由於鄭融一月要到上海與爵士樂隊夾歌，她表示到時會藉此機會多講國語，她說：「我覺得專登去搵個老師學國語反而冇咁好，因為語文一定係要透過日常生活多聽多講先至會學得好、印象更加深刻。我亦都去買咗一大堆國語碟，同埋我嘅模仿能力都幾高，相信到時應該可以唱到嗰種韻味出嚟啦。」
對於習舞多年的鄭融來說，她最希望可以擔任歌舞劇的女主角，她說：「一直以嚟藝人都好少機會做一啲好藝術性嘅表演，本身我對歌舞劇有好大興趣，加上我學咗芭蕾舞都有十二年，所以我都好希望做到一個歌舞劇，可以畀到機會我表演一下自己嘅專長。」
採訪：李珮洳
攝影：葉君海
化妝：Vincitsang.com
髮型：Adolph（Headquarters）
場地提供：海港城
