由音樂大師安祖萊韋伯（AndrewLlyodWebber）首次監製同編劇、《明日之後》新晉靚女艾美羅森（EmmyRossum）主演嘅電影版《歌聲魅影》，啱啱入圍今屆金球獎喜劇?音樂組「最佳電影」，而套片會於三十號喺本地上映。
《歌》片為咗重現一八七○年全球最大嘅巴黎歌劇院嘅華麗氣派，劇院天花嘅大型水晶吊燈就用咗二萬粒施華洛世奇水晶，盞燈高十七呎、闊十三呎，重二點三噸，值成千萬港紙，足足整咗四個月先砌得掂，可謂價值連城。而主角魅影為咗搶番姬絲汀，不惜擊碎吊燈，用佢嘅癡戀仇恨將劇情推上沸點。
至於電影嘅服飾亦以高貴優雅為主，兩度榮獲金像提名嘅服裝師亞歷珊特娜貝妮（AlexandraByrne）擔任服飾指導，佢同設計組縫製咗三百套戲服之餘，亦重喺歐洲搜括咗二千件戲服。片中好多戲服同女主角嘅訂婚戒指，以至美妮哉花（MinnieDriver）嘅戲服，都鑲滿晒施華洛世奇水晶，極之豪華，咁多閃令令嘅水晶，睇到我羅拉口水都流埋。