機舖在香港人心目中是個烏煙瘴氣的地方，重話一家大細齊齊打機？簡直天方夜譚！但日本最近興起的一家新潮機舖，唔只後生仔是常客，連老竇阿媽阿爺阿嫲小朋友都啱玩，機舖入面乜都有，唔打機，總有一樣遊戲啱你，出街打機絕對是合家歡好節目。
記者、攝影：張一豪
大細老嫩齊齊玩
收費玩幾耐計幾耐
日本最近興起一家名為「U-PARA」的機舖連鎖店，各分店佔地近60萬呎，入面有齊大大小小新舊電子遊戲機，環境絕對乾淨又唔雜，後生仔三五知己當然啱玩，估唔到重預埋三歲同八十歲㖭，皆因場地設備又齊又多又騎呢，最過癮係附設卡拉OK同漫畫室，玩到攰可以睇漫畫唱K已經夠騎呢，連魚都有得釣就真係要寫個服字！此店另一特別之處，是標榜最新式的「計時式娛樂」收費，9成以上設施任玩任用，收費方式以使用分鐘計，玩幾耐計幾耐，因此大受歡迎，平均每月有5萬顧客使用，而這最新的第三家分店，最近剛在神戶開幕。
重新建立人際關係
香港開機舖純粹為錢，「U-PARA」開店卻為重新建立和諧融洽的人際關係，老闆福岡喜將有使命感：「𠵱家生活緊張，個個都向錢看，人變得愈嚟愈冷漠，人際關係愈來愈疏離，以前公園係互相建立良好人際關係嘅地方，爸爸會帶囝囝囡囡落公園盪鞦韆，媽媽同公公婆婆就坐埋一邊同街坊傾偈，𠵱家無人去公園，所以我就搞一個適合任何年紀、任何年代嘅人都可以一齊玩得開開心心嘅娛樂場所，希望透過各種娛樂設施，甚或簡簡單單打舖機，重新鞏固朋友、親子等人際關係。」
任玩遊戲動靜皆宜
「U-PARA」任玩設施種類非常豐富，幾乎你諗得出嘅都有得玩，有心玩一日一定玩唔晒，唔理你好動或好靜，都一定搵到適合自己的玩意。新開幕的「U-PARA」神戶店有2層，4樓適合好靜人士，可以一個人靜靜哋打OnlineGame、到漫畫圖書廣場睇最新漫畫、享受水壓噴射按摩、唱卡拉OK，重可以帶小朋友到兒童天地玩波波池㖭！5樓則以運動類設施為主，自問身手好可以玩攀石牆、腳痕可以踢足球、手痕可以打保齡球，還附設槍戰遊戲場地、棒球發球機，湊夠人數即時開Band。
4樓玩斯文
入吸氧機瞓番15分鐘，成個人精神爽利，出面做Spa無一千幾百日圓走唔甩，此店免費任用。
呢部係噴水式按摩機，靠水壓噴射按摩全身，放心！內有隔水層，唔使驚濕身。
除咗兒童天地，小朋友重可以跟老闆同店員學跳PARA-PARA，好開心！
5樓玩運動
在新宿玩棒球發球機要每局約$23發15球，呢度計時收費，玩幾耐計幾耐，抵玩好多。
踢番場友誼波都重得，問你服未？5樓另闢一個迷你足球場，可以1on1對戰大顯身手。
軍火庫？非也，店內有齊各式各樣的手槍，興致到一人一槍拎上手，即時打番場室內槍戰。
其他收費服務
玩到口乾，可以喺汽水自動販賣機㩒罐汽水，玩到肚仔餓又點算先？店內有迷你Cafe提供三文治、杯麵、零食，醫完肚再玩過都重得，想又食又拎？可以入錢玩夾公仔機，夾隻Cutie毛毛公仔返屋企留念，再唔係玩扭蛋機，睇吓扭唔扭到心水靚蛋，甚或玩番幾局彈珠機，贏唔贏到彈珠換禮物，睇你運氣嘞！
U-PARA神戶店
地址：日本神戶市中央區東川崎町1-3-3神戶HarbourLandBee'sKiss廣場4&5F
電話：（81）78-341-6111
營業時間：24小時
收費：入會費$23，會員每10分鐘約$5.3，非會員每10分鐘約$7.6；3小時以上套餐，會員$76起，非會員$114起
交通：大阪市大阪JR站乘神戶線往神戶站，HarbourLand出口
註：以上價錢為貨幣滙率折算，?100兌$7.6
