近日最流行嘅一句說話，唔係「穩定壓倒一切」，亦唔係「以民為本」，而係「合約精神」！
拆紅灣半島，係遵守「合約精神」，領匯上市，又係「合約精神」，而港燈申請加價，阿董又係要講「合約精神」喎！
黃面孔偽美國佬朗尼．陳話：香港係全中國最「共產主義」嘅社會。真係荒謬！香港有咁多「合約精神」，又點會係共產？共產黨同你講合約咩？當年土改，將地主啲地契一把火燒晒不特止，今時今日，返大陸做生意，明明簽咗約，共方都隨時反口，告到上「人民法院」，都冇叉用！
為咗粉碎朗尼．陳詆毀香港嘅謠言，香港人必須大樹特樹合約精神，實行合約抗共、合約防共，因為合約精神就即是保障「資本主義」制度嘅萬靈防腐劑！
所以，港燈申請加價，合約明明規定，港燈每年對股東嘅投資回報率，應有十三點五至十五巴仙！明明合約畀你加多啲㗎嘛，港燈就加得嗰六個幾巴仙！八方上個月收到風，話官商勾結，特區政府將會放水畀港燈按合約精神加價加到盡，點知港燈就加得嗰百分之六點五，咁你話嘞，港燈係咪對唔住八方呢亭小股民先！
另一方面，港燈嘅發展基金，又蝕到入肉喎！咁即是乾塘喇！咁請問你港燈，又係點樣管理盤數嘅呢？一係你就管理得宜，等到用戶唔使加電費，一係你就加價加到盡，等啲股民賺到笑，點知𠵱家你港燈加電費，就中間落墨兼半天吊，用戶又要畀多咗，股民又攞少一浸，係咪俾民主派李華明嚇一嚇，港燈就腳軟縮一縮，若然係咁，點解唔畀肥仔明坐入港燈董事局？
港燈好多股東，都係退休阿伯，諗住買佢隻股，等佢派吓股息，搣搣吓買包花生安享晚年，點知因為加價加得少，港燈股民明年收少好多，請問港燈，咁係咪要搵大班出面，遊行示威抗議先？
合約精神大晒，有合約精神，冇共產主義，強烈抗議港燈及特區政府破壞合約精神，加價加得咁少！
傳真︰2623-9278
電郵︰