雖然各大音樂頒獎禮在即，但對於被譽為「新四大天王」之一的梁漢文（Edmond）來說，此刻心情卻是非常平靜，畢竟他之前有八年的光景都是擔任「陪跑」的角色，習慣了冇獎攞的Edmond反而覺得親人重要，有獎攞當是鼓勵。
去年《七友》這一張大碟為梁漢文帶來不少獎項，轉眼又要面對本年度的樂壇頒獎禮，他更被譚詠麟列為新四大天王之一，但Edmond表示沒有為此緊張，他說：「我覺得獎項係對每個歌手嘅鼓勵，如果有獎攞當然會開心，不過諗番自己入行十三、四年，有八年我都係坐喺台下面等。
「好多人都問過我承接唔到之前咁輝煌嘅成績會點？我認為樂壇呢個遊戲唔係玩一年，加上做咗三十三年人，有好多嘢都經歷過，所以我都同自己講，重有啲乜嘢需要驚？總之盡過力，朝住自己個方向，積極去做就得。」
頒獎禮前都會有不少人預測誰能奪得男、女歌手的獎項，Edmond指他看好劉德華及楊千嬅，他解釋：「千嬅今年嘅唱片真係做得好好，而我一直都好佩服華仔咁多年嚟都咁勤力，佢嘅毅力真係可以話係non-stop，佢絕對有條件去攞男歌手獎。」
除了工作外，Edmond又表示近年對家人的態度改變不少，主要原因是因為梅艷芳去世使他明白到要珍惜身邊人，Edmond說：「我以前好少同屋企人傾偈，不過𠵱家我每一日都會爭取時間打電話畀屋企人。」
至於拍拖多年的女友Karen，Edmond透露與對方已有共識，雙方都滿足於目前的階段，他說：「其實一紙婚書都唔係最重要，最緊要係兩個人要清楚對方諗乜，總之將來我會係一個好老公同好爸爸。」
採訪：李珮洳 攝影：何國豪
化妝：Hetty 髮型：[email protected]
