西九是地產商「忽然藝術」的項目，千方百計跟外國藝術博物館接頭，拉攏追求的手法相當直接，浪漫欠奉，難聽一點，有點似媾女。
「點解一定要媾鬼妹？」榕樹頭阿叔問。
「本地薑嫌不夠辣，財團睇唔上眼。」正在飛象過河的阿叔答。
「老董恨做國際級，發夢都掛住飲鬼婆新抱茶。不過這種夾硬來的華洋結合，未必有幸福。將來鬧離婚，香港賠了夫人又折兵，手尾好鬼長。」
「洋妞玩一夜情就好，點會蠢到娶個鍾意蒲蘭桂坊劈酒的豪放女返屋企。老董呢個老爺，崇洋得騎呢。」
「生米煮緊，就快變熟飯，市民被迫做人情，但又冇資格鬧洞房玩新娘，真唔抵。」
「當正你有得揀，你睇中邊個，姓古的美國妹，抑或姓龐的法國尤物？」
「睇樣冇準，內在美至緊要。千祈咪娶個大使唔抹腳的萬花筒，周身名牌以為高人一等，歧視草根。」
「聽講鬼妹肯搭上香港仔，唔係恨錢，而係心繫家國，立志進軍大陸。」
「咁遲早掟煲或者紅杏出牆。連洋鬼子都睇好大陸市場，點解香港唔吼內地優質美女？」
「香港人包二奶的經驗豐富，早知道內地佳麗有料到，不過質素一流的，根本唔睬香港人。剩低那些，點裝身都似警方在西九掃蕩的北姑，呃人扮文化藝術都冇人信。」