雖然領匯（2382）上唔上到市，成為全城焦點，散戶無心炒股，但好彩金沙喺美國上市表現威威，噚日濠賭股幾乎隻隻都大發神威，令股市有番啲生氣。
不過，濠賭股一旺場，即刻有公司走出嚟批股，好似即將改名做黃金集團的邁特科技（1031），復牌兩日就大升足兩日，噚日收市即刻以先舊後新方式，每股0.34元，配售15億股，抽水5億銀，真係打針都冇咁快。
經紀陳話，有胡唔食，罪大惡極，咁好氣氛都唔集資，重要等到幾時？聽講今次邁特批股唔係派出街，而係集中於少數芬佬，所以估計批完之後仍然守得住。
由於批股關係，邁特今日可能要停牌。
另外，紡織股福田實業（420）噚日公布截至今年8月底全年業績，盈利比去年下降47.62％，得番1.8億元，雖然有股息7.5仙派發，但股價仍即時下跌7.27％，收5.10元。
經紀黃則話，其實好多分析員之前都估到福田盈利會倒退，唔明白點解市場反應咁大。
慕容小初