馮仁昭早幾晚喺灣仔君悅酒店撞到肥媽瑪莉亞，聽佢講先知原來佢部銀色ToyotaAlphard七人車俾賊人偷咗，肥媽話：「我個仔去ING搵朋友，將架車泊咗喺君悅酒店附近，而唔泊喺酒店。跟住唔夠一個鐘，就俾人偷咗，個仔打畀我，我咪即刻飛出嚟睇吓囉！𠵱家我報咗警，上年先唔見咗部四驅車，𠵱家又唔見一架價值四十幾萬嘅車，真係好肉痛。」
噚日馮仁昭再同肥媽通電話，佢話：「早兩日警方通知我，話架車喺志蓮淨苑附近搵番啦！警方都話我好夠運，竟然搵得番，不過我放喺車入面嘅聖誕禮物、銀包就俾賊人攞咗啦！𠵱家收番架車都有排執，不過今次我都好多謝警方，咁快可以同我搵得番架車。」
曹敏莉噚日喺將軍澳電視廣播城為無綫新劇《胭脂水粉》試造型，佢話：「劇裏面我係做有錢女，而且喺日本留學返嚟，所以都會好靚，而且第一次成班女仔拍戲，到時一定會好開心。」套劇入面有咁多女仔，問佢驚唔驚被搶戲份，曹敏莉就話：「唔怕，最緊要做好自己嘢。」
楊羚、商天娥同陳鍵鋒噚日喺灣仔一間教堂拍新片《天地孩兒》，楊羚有兩年冇拍戲，之前就忙住湊仔，佢話囝囝已經三歲，開始返學，可能個仔見嘅人多咗，𠵱家勁多嘢講，但係講嘅都唔係好嘢，搞到楊羚好煩，所以佢覺得湊仔辛苦過拍戲好多。問楊羚有冇打算追多個，信教嘅楊羚話要等神嘅安排喎。
高峰嘅前女友王納文因兩人嘅私生子王聖元，早排入稟向高峰索六十九萬人民幣撫養費，經一輪爭辯後，今日將有結果。內地報道指北京市朝陽區法院今日會宣判，身在北京嘅王納文透過律師表示，絕對唔接受早前高峰提出嘅二十二萬五千元撫養額，重話如果覺得審判唔公平，會繼續上訴。
金馬影帝劉燁參演陳凱歌《無極》一片，當然成為大家嘅話題，而對於劉燁嚟講，今次《無極》係佢首次演出嘅古裝戲，喺戲入面重飾演殺手。而講到陳導演，劉燁日前就話：「陳凱歌是個很好的導演，在《無極》中他一直想要表達他的觀念，可是我悟性不高，一直沒有理解他的意思。」
吳美珩同黃智賢噚日喺將軍澳電視廣播城為無綫新劇《開心賓館》拍婚紗戲，吳美珩重出動私伙婚紗，佢話：「呢件係我五年前喺美國幫朋友做伴娘時着過，好彩𠵱家重啱着，只係窄咗少少。我第日結婚都一定會着婚紗，因為女仔最靚係着婚紗嘅時候。」
