對英超球員嚟講，聖誕節無得放假之餘，重要應付更頻密賽期，認真慘情，好似紐卡素今年就決定取消聖誕節派對，等班球員專心備戰。
紐卡素每年都會舉行聖誕節派對，同班球員歡度佳節，但喺今年接手嘅桑拿士就提前同球員講，球會今年唔會按照傳統搞派對，重提醒班主力球員，聖誕節當日練波，備戰「拆禮物日」作客布力般；而球員之間相約享受聖誕節晚餐，桑拿士就唔會理會。
其實，紐記班球員諗住去桑拿士屋企搞派對，𠵱家只好互相約定度佳節。
桑拿士決定取消派對，我求大俠認為同紐記連續三場聯賽失分有關係，排名不斷下滑，𠵱家排到第十二位，又難怪桑拿士事先張揚，總好過哈利列納上季執教樸茨茅夫時，到聖誕節前幾日先至話加操！
AC米蘭禮拜六作客祖雲達斯，AC副會長加里安尼職球員先出口術，話就算呢場波唔係由光頭佬哥連拿（截稿前未公布執法人選）執法，都信其他球證會明察秋毫。話說禮拜日祖記險勝博洛尼亞，有輿論抨擊當場球證偏幫祖記。加里安尼表面上讚球證，其實擺明係叫啲球證醒定啲。
伯明翰中場沙維治喺周日英超聯，使出插眼招數對付維拉後衞馬貝治。事後前英超聯球證雲達就狠批沙維治呢啲行為卑鄙無恥，可能大家覺得佢仍然有一顆執法者嘅熱心至會咁講，但我求大俠亦懷疑，佢可能重記住當日沙維治走入球證休息室大便嘅荒唐行徑，至會咁激動呢！
周二晚重拾正選位嘅利物浦門將杜迪，最後關頭輸個肉酸波，將樸茨茅夫後衞馬菲泰萊嘅左路傳中波拍番出龍門口，俾路亞頂入扳平。賽後領隊賓尼迪斯仍然維護杜迪，換轉以前侯利亞執教，杜迪可能又要返去後備席等多三幾年嘞。利物浦無門將用，又係冇理由唔繼續用杜迪嘅。
唔少球迷都話曼聯嘅基斯坦奴有進步，起碼比初來甫到時少咗扭波，但似乎重係多咗啲，連隊友阿倫史密夫及加利尼維利都忍唔住，抱怨呢位新星太獨食！都係老費好嘢，即刻放呢位葡萄牙國腳兩周大假，等佢好好諗下應該點改善，兼避避鋒頭！老費真係用心良苦。
逢周一至周五見報