濠江賭業股輪流發威，邁特科技（1031）收購澳門君怡酒店後，噚日復牌，由於呢單交易引入賭王四太同埋金記老闆娘做股東，風頭一時無兩，邁特大升32.69％，收0.345元，成交量重誇張，有成13.2億股轉手，金額高達4.35億元，高過唔少藍籌股。
經紀陳話，江湖傳聞邁特會在短期內配股集資，集資金額聽講係以億元計，而以邁特呢個黃金陣容，應該可以吸引到唔少機構投資者。但小初有啲唔明白，邁特好似上個月先至批過兩次股，點解咁快又可以批股呢？
由於接二連三有股仔染指賭業即勁升，所以難怪人人都話要進軍賭業，好似廣益國際（530）同埋國新集團（1215）都話搞賭業，廣益即刻大升20％，收2.4仙，成交股數15億股，金額3424.9萬元。
經紀陳提醒小初，廣益今個月初曾先舊後新配售11.7億股，每股作價1.5仙，集資1755萬元，以現價計，接貨的投資者已經賺大錢。
慕容小初