一如過往，《蘋果》搵嚟大堆着數，畀準備行AGS嘅機迷。大家只要剪下印花，就可享有相關嘅優惠，想率先親身試玩PSP？一嘗會郁嘅體感《GT4》？使乜排長龍呀，呢兩日買份《蘋果》就得啦！
試玩PSP《蘋果》專隊印花
PSP絕對係近期人氣手提機，水貨更炒高至五千幾蚊，相當之無理，搞到好多有心買嘅機迷望門興歎。未入貨嘅唔使心噏，喺AGS嘅PlayStation展館內，擺放咗30部PSP俾大家試玩，勢必引嚟大量入場人士爭相試玩，排長龍在所難免。《蘋果》讀者只需剪低呢個印花，就可享用《蘋果》專隊，快快趣拎上手玩餐飽。
另外，PSP技術總監茶谷公之先生（MasayukiChatani），亦將親臨AGS正式公布PSP行貨推出日期、售價等資料，相信會有驚喜消息。行貨售價肯定合理，又有原裝保養，大家毋須急住捱炒價入貨。
《GT4》體感駕駛艙專隊印花
《GT4》體感駕駛艙專隊印花
呢個體感駕駛艙全球只得兩台，價值成百萬港元，好玩地方係成個駕駛艙會隨畫面擺動，搖擺幅度同靈敏度都好高，跟《GT4》夾得好好，恍如片緊真車一樣咁刺激，街機都未有咁好享受！
上年呢兩部體感駕駛艙登陸AGS，引嚟想像以外咁多嘅機迷排隊爭玩，每邊排隊人龍超過100人，差唔多要排成兩粒鐘先有得玩！最後有人發現揸住《蘋果》居然有條「私家隊」，唔使排得咁慘，卒之撲出灣仔搵《蘋果》。今年SCEH又再安排《蘋果》專隊，唔想排兩粒鐘先玩到，就要剪低今、明兩日嘅印花，享受下快速玩到嘅《蘋果》專隊喇！
《太鼓之達人5》專隊印花
玩完一輪緊張刺激嘅勁Game之後，不妨玩吓音樂遊戲輕鬆吓。《太鼓之達人》系列銷量一向唔錯，今次AGS提供最新嘅《太鼓之達人5》供試玩，配合PS2專用鼓同棍，跟住拍子「咚咚咚」起勢咁敲，相當之過癮，最啱拖友或一家大細齊齊玩，寓打機於運動之餘，重充滿親子Feel㖭！
半價消費享用VIPLounge印花
嫌會場人多又逼又嘈？SCEH又專誠Set咗間VIPLounge出嚟，最正係設有舒服座椅，重有靚靚電視機同環迴正聲音響系統，俾機迷歎住嚟打機，VIPLounge重供應埋小食、飲品外，重有靚靚姐姐教你打機㖭，嘩！真係好VIPFeel喎！想享用咁高人一等嘅VIPLounge，只需即場購物滿$1,380（只限SCEH展館）就得。若你屋企部PS2好地地唔使換，淨係想買幾隻Game聖誕節煲吓Game嘅話，就要剪低呢個印花喇。憑印花及半價消費（購物滿$700）單據，就可享用呢間VIPLounge，毋須買千幾蚊Game咁破費喇！
*憑今日刊登之印花享用優待，影印本無效。
*每張印花只限用一次。
*一切爭議以SCEH公布為準。