李克勤與容祖兒昨日齊在銅鑼灣宣傳合唱新歌《刻不容緩》，二人在三層樓高的大廈外牆為新歌大海報揭幕，吸引近二百人圍觀，需由警察到場維持秩序。二人又在卡拉OK內舉行的新歌首播會上大派禮物，十分熱鬧。
克勤事後表示揭幕時刻意向外張望，他說：「我都未驚過，其實都唔算高，我拍《六壯士》時重高，覺得好過癮，對高度冇問題呀。」克勤稍後將推出新唱片、拉闊現場大碟及一張輯錄過往舊MV的大碟，而他稍後又會派新歌上台，實行趁年尾博到盡，他說：「我有首高格調嘅《大時代》，有首好笑嘅《神州行》，講香港男人搵唔到女友，返內地娶老婆，到時我會排舞。」連出三碟的克勤表示不會給自己壓力，他說：「好多相書話我出年吉星拱照有貴人，冇問題嘅。」
而祖兒被問到想不想冧莊得大獎時說：「隨意啦，唔一定要得獎，自己叻，人哋都努力嘅。」有指楊千嬅借運，祖兒對此說：「傳咗好耐啦，一個人靠運氣，實力都唔可以忽略，拜神一定有，借運我冇親眼見唔會信。」祖兒又指人生必有高低潮，命運安排應順其自然。
採訪：王連連 攝影：陳偉權