業主急於套現，往往為炒家或用家提供執平貨機會，好似北角和富中心，一座低層B室業主，半年內四度減價，埋單比市價低一成八。
佢半年前放盤，叫價六百一十八萬，但一直冇人問津，先減到五百七十萬，兩個禮拜前再降至五百四十萬，點知仍然冇反應，日前再平多十萬，終於俾區內投資者承接，單位千四呎，每呎三千七。
中記林龍南話，呢個單位喺低層，對住東區走廊，都幾嘈，用家多數都唔鍾意，加上冇裝修，所以咪要平啲至吸引到買家囉。佢話，對上一層一個有裝修單位，九月都賣到五百八十萬，今次計落平咗一成八。難怪炒家樓都唔使睇就扑槌！跟住加價放售，估計可以賣高一成至一成半。
林龍南話，和富現有三個千四呎放盤，全部係低層，叫價最平都要六百四十萬。
澳門樓市蓬勃，到處都見地盤動工，二手買賣愈嚟愈活躍。蘭西最近收到美聯嘅成交個案，當中有個氹仔金利達花園第四座中層AB室買賣，九百零八呎，成交價五十一萬，每呎五百六十二。
蘭西初時以為，同香港一樣，澳門都興打通兩個單位做相連戶，問番美記楊朗明，佢話其實係一個單位嚟咋。
原來澳門大規模樓盤，單位會以英文字母排列，但排法唔同香港，例如每座有四伙，唔係座座都用A至D室，只係第一座叫A至D，第二座就E至H，一路咁排落去，若果個盤有七、八座，二十六個英文字母都唔夠用，於是以AA、AB、AC室再排過。
金利達花園共有四座，每座八伙，所以最後一座就出現AA至AF室嘞，千祈唔好誤會係相連單位。
呢個排法，好處係每個單位都變得獨一無二，唔驚搞錯，但若果第二時，澳門興打通兩個單位做相連戶時，就好麻煩嘞。
重有個零禮拜，先至係聖誕，火炭晉名峰示範單位，噚日已經預先聽到報佳音。
由永泰李簡鳳玲做指揮，南豐麥一擎打三角鈴，平時喺地盤做生意爭崩頭嘅四大代理行，就各派代表，扮演小天使，列隊唱聖誕歌。
佢哋獻唱中英文歌各一，中文歌詞經過修改，加咗讚揚晉名峰嘅內容。
李太話，代理平時要做生意，難免有幾分戾氣，今次一齊唱聖誕歌，難得和諧，相當少見。李太發覺，佢哋好多位，歌喉原來唔錯，又自己度埋手勢配合，真係幾有表演天份。
啲人鍾意睇示範單位，住宅新盤梗唔少得啦，估唔到𠵱家連商業盤，都開始要搞埋示範單位。
新地上水廣場，同宜家傢俬合作，提供辦公室設備服務，重喺現樓，搭咗個有家具及裝修嘅示範單位，畀租客感受一吓，呢項服務有幾好。
新地代理物業投資部助理總經理（租務）文志峯話，上水廣場示範單位，突破傳統辦公室設計，注入大量「家」嘅元素，以淺色為主調，採用開放式活動設計，作用可以加強上司同下屬嘅溝通。
上周五搞拆售嘅深水埗深之都商場，乃係罕見拆骨摸貨，蘭西講過，土地註冊處查唔到個新買家，估唔到，新業主反應咁快，前日就飛身去登記。
噚日終於確認，買家係投資者尹栢權。買入價易易發，即係兩億二千八。
個場𠵱家重係龍朝酒樓，地下至三樓，共三萬幾呎，中記話，二、三樓間咗三百個細舖，賣出成二百件，套現近兩億五，暫時封盤埋數。
照咁計，如果個場賣晒，唔難收番六、七億，今次尹栢權真係發嘞！
電郵地址：
