董團夥執政失敗，玩人功夫，就愈來愈有進步！平機會主席朱楊珀瑜，受咗老董欺騙，矇查查以為「臨危受命」，接過平機會爛攤，以為女媧煉石補青天，會修補番俾鄔維庸王見秋呢對連體「共工」撞冧嘅機構！
點知，老董踩住朱楊膊頭過河，借朱楊嚟執狗屎，慢慢搵人，搵到個現任個人資料私隱專員鄧爾邦過檔，一簽就五年約，而朱楊柏瑜喺慘遭董團夥欺騙之後，充滿侮辱性地被告知，只係續約七個半月！
咁擺到明就係搵朱楊珀瑜老襯！可憐朱太，假假哋都係社會福利署前副署長，賢良淑德，喺社會上，都算薄有名氣，點知俾老董當係一張門口席，用對腳捽抹完畢，留低污泥，現在一聲夠期，就當垃圾咁清除，朱太名譽受損今後出嚟購物打麻雀，笑都俾人笑死！
平機會講明反歧視，董團夥前滋擾胡紅玉，後侮辱朱楊珀瑜，兩個都係有知識有抱負嘅優質婦女，但袒護嘅前有王見秋、鄔維庸，後又優待鄧爾邦，都係男人，咁請問董何集團，係咪刻意歧視女性？
一個政府請人，動作之小家種，董團夥咁嘅所為，都算係世間少見！搵人嚟過橋，鑊就有得你孭，彩就冇你份攞，態度兒戲，毫無誠意，唔怪得十八萬公務員，對呢個團夥死晒心，拒減人工，樣樣鍊盡，皆因為唔可以同呢班廢物講心！
不過話時話，朱楊珀瑜誤上賊船，當初冇帶眼識人，明明係個金魚佬，哄你上天棚，你就當佢係華倫天奴，到頭來慘遭浩劫，悔不當初，自己點都有少少責任！黎慶寧、陳方安生，甚至梁錦松，跟呢個團夥，有辦你睇，就係一個中國小宮廷、太監、奴才、婢女，乜都齊，就係冇乜幾個似人樣，朱太虎口餘生，今次執番條命，記住要吸收教訓，見到一個肥伯伯拎住包金魚，千祈咪立亂跟佢上天棚呀！
傳真︰2623-9278
電郵︰