日本無論慶祝、舉行祭典、賞櫻花或工作聯誼必定飲酒，據日本政府的統計，03年度日本的酒稅收益高達1兆668,440億日圓，大約消耗了95.92億公升酒精類飲品，你都咪話唔厲害！香港人宿醉第二朝起身會按太陽穴保持頭腦清醒，日本重騎呢，有所謂的「DIY解酒按穴法」，飲酒前同飲酒後按穴一樣有效咁話喎！
記者：方英男 攝影：陳陶鈞 模特兒：Silver（StarAsia）
場地：TheEden（28510303）
日本人勁鍾意飲酒！
按穴解酒夠騎呢
日本是嗜酒民族，時近聖誕新年，㗎仔㗎妹一定開P劈酒劈到天昏地暗，飲嗰陣當然好High，飲完就個個第二朝又屙又嘔又頭痛，有見及此，日本著名資訊雜誌《DIME》最新一期12月號就做咗個專題，搵嚟日本中醫醫學總合研究所的石野博士推介「DIY解酒按穴法」，重巴閉到可以分飲前按同飲後按㖭，㗎仔出名夠騎呢，為證實係咪咁巴閉，我們搵嚟麥鐘文穴位針灸中醫師評一評，睇吓㗎仔呢套「DIY解酒按穴法」係咪咁堅！
飲前按
麥醫師：「肝臟反射區、肝穴、腎穴只是輔助穴位，曲泉穴可清熱去濕，輕按這些穴道無疑可提高肝臟功能，增加分解酒精的酵素，但講到事前按這些穴道就不會飲醉酒，未免神化了點。」
飲後按
麥醫師：「按足三里穴控制胃和血壓，按豐隆穴可以去熱，這兩個穴位是可促進大腸蠕動和增加小便，加快身體排出酒精，按內關穴則可寧神養氣，飲醉酒按這些穴位，確有很大的幫助。」
古方騎呢解酒食物
飲大咗第二日宿醉未醒，第二日無厘胃口作嘔作悶周身唔舒服，香港人興沖番杯花旗參或者熱茶醒醒胃，日本人又會飲啲乜食啲乜嚟解酒呢？以下係日本民間流傳嘅解酒食物同偏方，Work唔Work就唔肯定，但用料就實在太過騎呢，你有無膽擺入口試試？
櫻花樹皮煲炭水
N年前日本古方，用刀刮下薄薄一片櫻花樹皮，先用火燒至全黑變炭，放煲用三碗水煎成一碗水，毋須調味，趁熱飲就可以解酒，據聞對宿醉非常有效，梗係喇，叫你飲炭水喎，飲落口都唔知乜嘢味，聞到陣味都醒喇。
綠茶放話梅
茶含咖啡因，有提神作用，話梅含大量鹽份，可分解引起疲勞的乳酸，味道酸酸鹹鹹可以刺激味覺。製法簡單，一粒日本話梅放入一杯中國茶，用綠茶如茉莉沖話梅，效果會比紅茶好，因為綠茶性質寒涼，有助去肝火。（日本話梅8粒裝$54，city'super）
勁臭納豆
日本嘅傳統佐飯食物，味道古怪似臭豆腐，含多種維他命和蛋白質，根據「日本納豆協會」的實驗報告顯示，納豆可促進肝細胞的新陳代謝，提高肝臟消化酒精的機能，不過納豆勁臭，好多日本人本身都頂唔順，你頂得順先試喇。（每盒$12，city'super）
乳酪助排便
酒真的會入愁腸，喪食4至5杯乳酪落肚一樣可以解酒，因為乳酪含豐富脂肪和蛋白質，能加速腸臟蠕動速度，有利排便，變相增快驅散酒精的速度，加上酸酸哋易入口，宿醉無胃口都食得落，不過腸胃不適者咪試，屙到唔停盞搞。（$7.5，各大超市）
食豆腐最經濟
最平價的解酒食物，豆腐由大豆製成，含大量良性蛋白質，提高處理酒精的能力，減低肝臟的負擔。（$2，街市有售）
吸純氧氣驅乙醛
呢個方法科學啲嘞，原來㗎仔興吸純氧解酒！酒精進入血液後會變成乙醛，乙醛就是令你頭痛不止的真正元兇，吸純氧能夠令頭腦清醒，增加身體五臟六腑的活動功能，加速分解體內乙醛，一樽含5,000ml純氧，夠吸2分鐘。（5支裝$304，NETPRICE網上訂購： http://www.netprice.co.jp/）
註：以上資料可參考以下網頁：
1.生活情報館： http://www.horidashi-ichiba.com/chiebukuro.file/hutukayoi.htm#hutukayoinattara
2.日本酒精健康醫學協會網頁： http://www.arukenkyo.or.jp/
