近年愈來愈多人鍾意用購物車，拖架購物車去購物載貨，總比左一抽右一袋方便得多。近年購物車的花款都開始講究起來，除不同的設計以迎合不同的需求外，款式亦變得比以前時尚，有姿勢有實際。若嫌購物車過於重型，另有多款購物袋同樣實用，睇完先慢慢揀都未遲！
記者：黃婉冰
攝影：黃子偉、蔡鴻雯
ImageGirl：Vicky
新興購物車袋車合一
「一車在手，世界通行」，近至去街市，遠至返深圳或去旅行，一架購物車確實幫輕唔少，所以近年購物車亦愈出愈多，愈出愈靚。其中以袋式購物車最受歡迎，因為購物車上的袋可以分拆出來當作普通袋用，一舉兩得！
潮爆Unwashed老牛索袋
一般購物袋多以帆布製造，這款Unwashed老牛都算是罕有貨色。牛仔袋款式唔老土，就算同車架分拆開，當普通袋拎出街亦不失禮。車架輕，無用時可以摺合，收藏與攜帶同樣方便。
售價$119(a)
尺寸：闊21×深11.5×高82cm
激似名牌格仔袋
除索袋款外，長形袋是另一大熱款式，特別係呢款激似名牌嘅格仔袋，款式較中性，男女拎都適合。風琴式長形袋容量夠大，袋前附有拉鏈袋可放濕碎雜物，摺合式車架及選用拉桿式膠手柄。
售價$139(a)
尺寸：闊30.5×深25.4×高96.7cm
七彩條子至搶鏡
七彩ColorBar條子襯鮮藍色大袋，款式名副其實玩到七彩。索袋容量較大，啱晒需要載大量物品的人士使用。車架重量輕而實淨，布袋可分拆變成手挽袋，梯形手柄附有防跣膠，唔怕跣手。
售價$76(c)
尺寸：闊32×深20×高51cm
Dunlop輕型拖車
Dunlop出品，全架淨重只有2.1kg，非常輕巧，配合超大膠轆設計，拖行時可避免反車的情形出現。尼龍袋防水耐用，袋前附有膠扣及拉鏈袋，物品可以擺放得密密實實，拎去旅行掃貨啱晒。
原價：$300
特價：$180(h)
名牌貨
尺寸：闊40×深17×高60cm
載得密實
五顏六色唔啱心水？這款杏色×斜間尼龍袋可能較合心意，袋款細細長長，但容量足以應付平日拖去街市買餸或Shopping之用。袋前有膠扣夠晒密實，尼龍袋有手挽，亦可分拆出來獨立使用。
售價$79.9(b)
尺寸：闊35×深20×高53cm
多袋間隔
這款購物車，備有小袋間隔，索袋前有兩個小袋，袋後又有另一個小袋，用來放濕碎物品最妥當。布袋與車架可分開，可分別將布袋及車架摺合起來攜帶出街，Size細細適合女士們使用。
售價$68(c)
尺寸：闊41×深24×高35cm
HelloKitty啱後生女
數靚款設計，呢個HelloKitty是不二之選。Kitty大尼龍袋附有摺合式車轆，摺起後就可變成普通手挽袋，放下車轆即變成購物車。布袋可摺成長方形，易於攜帶。
原價：$55
特價：$29(e)
尺寸：闊29.5×深16×高51cm
經典超市購物車
購物車又點少得city'super經典之作，購物袋用上耐用的厚身帆布製，袋下附摺合膠轆，變袋變車話咁易。將布袋摺起貼上魔術貼，將之變成長形小包，帶出街話咁易！
售價$60(g)
尺寸：闊35×深24×高52cm
至潮ColorBar
ColorBar顏色超搶鏡，啱晒一眾好「色」之人。袋前有兩個魔術貼小袋，便於收藏物件，將袋與車架分拆開，布袋就可充當普通手挽袋使用。車架重量好輕，加上袋仔細細，推去街市買餸啱晒。
售價$99.9(d)
尺寸：闊26×深24×高74cm
籃形車仔硬淨容量大
除袋形購物車外，籃形及單架式行李車仔是市面另一最Hit款式。此款最大好處是容量較大，而且不銹鋼車亦較耐用實淨，用來盛載行李或大量物品都唔怕變形。可摺合式設計，攜帶一樣方便。
鋼籃耐用唔變形
論耐用襟撞，不銹鋼籃當然是首選。全個以不銹鋼條製造，遇到碰撞或盛載重物都唔怕會走樣變形，同樣可以摺合起來收藏，大容量推去超市入貨夠晒用。
售價$59.9(a)
尺寸：闊32×深30×高80cm
箱形膠籃載埋寵物
長形膠籃式設計，容量夠大，可用來作購物之用外，亦可用來載狗仔出街。將購物車收摺起後，外形就只有一個手提篋般大，車身重量頗輕。
售價$149(a)
尺寸：闊33×深29×高50cm
綁行李最好
要運送大件行李，傳統行李車仔會較適合。行李車左右兩邊有不銹鋼架，拉開後可放置較大件行李，手柄位有兩條粗橡筋可以將行李綁到實一實，收摺簡易，攜帶方便。
售價$99(a)
尺寸：闊32×深14×高53cm
購物袋環保美觀
普通去Shopping毋須要出動到「戰車」，購物袋是另一方便又環保之選。以前環保購物袋款式千篇一律，有實用性但欠缺美觀性，經過時代進步，家陣十蚊一個購物袋都可以靚到就咁拎出街。
買袋做善事
這款新出名為「吉之島‧愛環保」的購物袋，收益將會撥捐「綠色力量」，共有三款圖案選擇，全是設計比賽得獎之作，支持環保又可做善事，義賣活動截至12月31日止，想買要快手。
售價$10(f)
尺寸：高35×闊37cm
變身版紅白藍
黑白格尼龍袋，都算是經典紅白藍的變身版本。由紅白藍三色演變為黑白格仔，質料厚而堅韌，當買餸袋或潮襯去街一樣掂！
售價$10(f)
尺寸：高50×闊45cm
靚靚和風索袋
以日本不織布製成，袋面印滿花花圖案，充滿和風色彩。索帶款式較少有，用作平日出街袋亦可，另有紫色供選擇。
售價$10(f)
尺寸：高43×直徑24cm
循環使用保冷袋
尼龍袋內有保凍層，可有效將雪藏食物保凍。去BBQ用來存放燒烤食品一流！
售價$32(g)
尺寸：高29×闊42cm
不織布輕而韌
全個以日本不織布料製造，比一般棉布袋更薄更輕，但堅韌程度不遜於棉布，可輕易摺叠起來收放入袋。
售價$10(f)
尺寸：高38×闊52cm
店舖資料：
(a) 實惠（26638833）旺角荷李活廣場一樓全層
(b) 吉之島（26276688）紅磡黃埔花園第五及六期
(c) 萬豐（21941889）旺角自由道3-7號富威花園地下B舖
(d) 日本城（23636359）黃埔花園十二期商場（HOMEWORLD）地下16號舖
(e) Trendyland特賣場（27449633）長沙灣廣場第二期5樓
(f) 吉之島10元廣場（34282138）銅鑼灣京士頓街9號家居廣場1樓
(g) city'super（25062888）銅鑼灣時代廣場B1地庫
(h) WingOnPlus（27106288）彌敦道345號永安九龍中心