吳君如與余文樂前晚在中環出席一本旅遊雜誌的宣傳活動，雷怡暉和雷永晃等都有出席。穿上低胸服飾到場的君如，表示正在上海拍新劇《天下第一媒婆》，自言十分辛苦，她說：「重要拍多成個月，總共要拍四個月。我三年內都唔再拍劇，日日做十五個鐘，頂多瞓到七個鐘，每日做同一樣嘅嘢，我真係唔慣，好辛苦，𠵱家明白無綫班人點解叫做鐵人，我都未試過咁金。」
君如有份演出的《功夫足球》口碑欠佳，她謂：「我只係客串十幾日，收視有三十幾點（按：《功》劇上周收視只得二十八點）都唔錯呀。健仔（張衞健）啲嘢係卡通啲，可能觀眾睇完《金枝慾孽》，口味一時接受唔到。」
採訪：張俊 攝影：陳志嵐