洗碗阿嬸跟風學地產商忽然藝術，她無傳媒記者那麼吃香，無地產商包團請去五個國家免費考察當地博物館，惟有自己執生，耳聽八方。阿嬸認為，文化這一瓣，政府長年累月不積極，年年虛耗幾十億行政管理費，得個表面風光。所以阿嬸傾向理性支持西九脫離政府，由私人商家全權管理。「可是，地產與文化的融資財務完全不透明，到時怎麼營運法，容乜易黑箱作業。政府塊靚地就係咁批了給奸商，市民無仇報。」洗地阿嬸家住廁所難轉身的居屋，對地產商的誠意高度戒備，擔心不無道理。
「由政府搞文化，讓商家搞地產，咪又係變成另一個數碼港。數碼港靜過鬼，貝沙灣就高調大賣。普通市民，根本唔知薄扶林有個IT基地。」
「政府無能，商人無良。睇維港巨星匯就知，政府信錯個美商，以為佢好掂，搞出個大頭佛以後還不肯道歉。西九牽涉重大，郁吓都唔止擲一億落維港。」
「我唔識文化藝術，不過地產商唔見得叻過我。博物館由佢哋打骰，年年搞鄧小平展或者長期租畀愛國畫家，試問點國際級得起？得啖笑。」
「政府更可怕，萬一運條毛屍在天幕下展覽，認真國際笑話。」
「相由心生，官商都唔係好人，西九唔慌好嘢。」
「西九太多爭議，老董學精擱置。到下屆特首跟溫家寶斟掂數，實行大搞西九賭場，賭仔不惜借大耳窿養育藝術，叠碼仔和收數佬都屬於文化界，直接推動本土文化。到時俾藝術家淋紅油斬全家，你與有榮焉㖭。」