朱茵與黃貫中（Paul）拍拖五年，幾乎每逢聖誕節都要在工作中度過，今年兩人亦分別要到外埠公幹，難怪朱茵認為最理想的聖誕節是在休息中度過。不過去年朱茵與阿Paul難得在尖沙嘴鬧市過節，她笑言在數十萬人群中穿梭，有種同甘共苦的感覺，非常難忘。
今年已是朱茵與男友黃貫中拍拖的第五個年頭，五年中大部份聖誕節都要在工作中度過，朱茵說：「聖誕係一個好開心、好浪漫嘅日子，今年如果冇改變嘅話我都會去到加拿大拍廣告，要做嘢都冇辦法。有時做嘢反而會更開心，因為大家都可以做到自己鍾意做嘅嘢嘛。」
最令朱茵難忘的一個聖誕節，是去年她偕阿Paul在鬧市與三十九萬人一同度過，朱茵說：「我記得舊年我同阿Paul一齊喺尖沙嘴食聖誕大餐，因為酒店嘅停車場門口封路，所以就將架車泊咗去另一個停車場。我哋嗰日重好早，六點半就去到餐廳，點知走嘅時候出面就已經好擠擁，真係有一種同甘共苦嘅感覺。」
朱茵續說：「最艱苦嘅就係原本只係要行十分鐘嘅路，最後要行成兩個鐘先可以行到去，估唔到我哋易咗容個個都認得出，不斷同你打招呼，真係好好笑。」
近年朱茵的工作量大增，休息時間相對減少，難怪她認為最理想的聖誕節是好好休息一番，她說：「最過癮就梗係要休息，喺雪地上面開party，同啲狗一齊拆禮物，要有朋友嘅時候有朋友，有私人時間嘅時候要私人，唔係二十四小時咁少嘅。」
採訪：羅慧敏
攝影：仇志德
服裝提供：dada
