中航油（ChinaAviationOil）在新加坡上市，因盲目亂炒石油衍生工具，與外資大行對賭，猛沽認購期權（sellcalloption），碰啱石油期貨大升特升，於是一敗塗地，唔見五億五千萬美元，輸死咗之後，哈，石油期貨價格大跌噃，你話CAO唔夠運吖，唔夠財力畀孖展吖，還是中伏，做咗國際大鱷點心呢？我哋唔知，總之中國企業衝出世界，交學費交極都交唔完。
如果中航油在香港上市，香港咪好杰，大受打擊？有高人喝住：「唔會嘅，中航油曾想在港上市，香港嘅守門員有德國鋼門簡尼咁好功夫，冇失守！」哦，畫公仔唔使畫出腸，大家明白啦。高人又話：「內地企業仍然唔明白香港點解揸得咁緊。譬如創維事件，主席涉嫌盜用公司款項，俾廉記拘查。內地啲市場人士竟然同我哋講：唓，挪用嗰三幾千萬，濕濕碎啦，香港使唔使咁巴閉，要出動ICAC呀？我哋啲公司老闆，隨時動用公款三幾億啦，邊算偷啫，暫時借用，周轉吓之嘛。嗱，我聽到呢啲批評，都唔知點講好！」
根本冇得溝通，費事講，內地監管既然寬鬆，民企喺內地上市算啦，做乜輸送利益畀港交所，係都要嚟香港上市？高人話：「你有所不知，嚟香港上市，費用多少，非常透明，但在內地上市，冇數可預，好多費用上唔到枱面。民企諗過度過，嚟香港有着數，你估真係明益我哋呀！」
高人所言有理。個人遊遊客選香港作幾日遊，係完全自願嘅，覺得香港有好處，先至走落嚟，好似香港年輕女士鍾意去日本掃貨一樣啫，唔係香港遊客明益日本。高人話只要香港保持廉潔、法治，仍然擁有最大競爭優勢。