噚日係四叔李兆基嘅恒基集團喬遷之喜，八方喺IFC大門口觀察，簡直係城中講得出嘅大冧把都有到場恭賀，好似四叔好朋友新世界主席彤叔鄭裕彤、係伯爺個代都好熟嘅新鴻基地產副主席郭炳江、同樣姓李嘅東亞主席李國寶同埋佢個局長細佬李國章，下屆特首大熱之一嘅財政司司長唐唐等都魚貫到來。
不過，據現場觀察發現，噚日到場賀四叔嘅嘉賓，所得嘅待遇，原來係有些少唔同。好似頭先所提及嘅大冧把，就可以坐四叔專𨋢直上酒會，其他就要坐普通𨋢。當中好似九倉主席吳光正咁，都已經行到專𨋢口啦，但都係俾人「請」番去坐普通𨋢，真係唔明點解。
臨走時，恒基送咗個透明水晶地球畀嘉賓，唔知有冇乜嘢寓意呢？
傳真︰2623-9278
電郵︰