張栢芝前晚錄影《獎門人》，玩遊戲輪流講女藝人名字時，她竟講出謝霆鋒，又死撐因聽到王菲便想到霆鋒，主持人曾志偉聽罷即指三人糾纏不清。
無綫節目《繼續無敵獎門人》前晚錄影，請來張栢芝、李克勤、夏韶聲、安雅、黃家強和蓋鳴暉擔任嘉賓。栢芝孭克勤行石春路時，志偉即說：「成頭家都孭得起，冇理由孭佢唔起嘅。」其時錢嘉樂亦插嘴說：「區區一個李克勤，點會重得過頭家，孭頭家真係唔容易！」栢芝拿他們沒辦法，惟有說：「係呀，我孭住鬍鬚勇吖嘛。」
到「無敵私人醒」環節，主持要嘉賓輪流講女藝人名字，安雅講完「王菲」後輪到栢芝，栢芝竟爆出個「謝霆鋒」，志偉沒好氣說：「女明星呀，謝乜嘢霆鋒呀。」栢芝解釋因為聽到安雅提王菲，所以她便想到霆鋒，志偉聽罷說：「唉，你哋三個真係糾纏不清。」但栢芝亦不甘示弱死撐說：「大家以為霆鋒係男人，其實佢係基㗎！」
接着到吹蠟燭環節，錢嘉樂見栢芝吹剩一支蠟燭時，即抵死地說：「霆鋒喺前面，你吹啦。」而林曉峰亦加把口說：「王菲都喺前面，你吹啦。」栢芝終按捺不住當眾叫嚷，指整晚拿霆鋒及王菲來開她玩笑，實在有欠公平。
及後問栢芝可介意被主持整蠱，她笑說：「唔介意，不過我最怕克勤蠢，贏唔到禮物啫。」對於霆鋒指若能籌得一百萬善款，他不介意等栢芝等足三日三夜，栢芝說：「佢講笑啫，大家得啖笑，做善事啫。」栢芝又表示聖誕節原本打算跟家人到加拿大探望胞姊，但訂不到機票，想去北海道旅行又太貴，所以決定留在香港。
此外，家強孭安雅行石春路後，再跟對方啜紫菜時，無意中跟安雅嘴碰嘴，可謂豔福無邊。問家強跟安雅身體接觸可會有生理反應，他說：「冇咁易，我係大人，有定力。」
採訪：卓美娟 攝影：何國豪
