電單車專題：<br>烈火戰車2005全新二衝狂爆登場

電單車專題：
烈火戰車2005全新二衝狂爆登場

隨住科技進步，加上環保問題，二衝程跑車早年已開始陸續停產。喺日本車廠完全停產、又無車行引入歐洲車款嘅情況下，香港僅有嘅忠實「華弟」迷只有向二手車埋手，但經過長期狂劈、劇烈老化及損耗嘅機件，卻大大增加二衝跑車嘅危險性。最近有代理正式引入意大利Aprilia生產嘅二衝跑車，而且重係最新款，RS125絕對係同級「烈火戰車」嘅唯一選擇。華弟！係時候摷番你件短身牛仔褸出嚟，再次體驗二衝車帶嚟嘅強勁爆炸力喇！

記者：馬慶武　攝影：黃子偉　Model：Cat（StarAsia）

歐洲125cc戰車銷量王

250cc或以下級別嘅二衝程跑車，喺「烈火戰車」年代曾經風靡全港，當時街上勁多一身短牛仔褸襯緊身石磨藍老牛、腳踩K-Swiss騎PGM嘅老翻「華弟」。但自從賽車進入四衝程時代，低容積嘅二衝跑車已買少見少，二手車質素又參差，想體驗二衝跑車威力嘅車迷無乜車款可選擇。今次Aprilia香港代理「亞林」首次引入RS125車款，係全港二衝程跑車唯一新車之選，而且呢款車更係歐洲125級別跑車嘅銷量王，質素絕對有保證。

■RS125的外形與2003年奪取GP250世界冠軍嘅車款RSV250跑車極相似，好有落場feel。

極似世界冠軍車款

勁有落場feel冠軍車花限量版RS125可以話係Aprilia賽車技術嘅結晶品，鋁合金車架，直徑40mm嘅倒立前叉和單筒尾避震都係參考同廠落場砌嘅賽車設定。就連外形和同廠於2003年奪取GP250世界冠軍嘅車款RSV250跑車極相似，由車頭入風口到車身Fairing再到尖形車尾都一樣咁流線，將風阻減至最低。除咗標準黑色版本外，Aprilia更推出一款Poggiali限量版，車花跟足世界冠軍車手Poggiali嘅戰車RSV250一樣，車尾印住54號，更令RS125充滿落場Feel。

■標準版(圖)與限量版最大分別在於黑撞紅嘅車身同一對火紅胎軨。
$48,800(標準版)

■ManuelPoggiali係03年GP250嘅世界冠軍，RS125限量版就係跟足呢部戰車嘅拉花，淨係無咗贊助商商標。

30匹爆炸力高轉最好劈

二衝機器嘅強勁爆炸力，未見識過都應該聽講過！擁有30匹最大馬力嘅二衝單缸引擎，配上車重只有93.5kg嘅RS125唔只夠用，重夠劈有餘。緊密嘅六前速波箱，一定要波波盡，盡情發揮二衝跑車愈高轉愈精神嘅特性。雖然二衝車沒有引擎牽引力幫助減速，但採用頭尾透氣碟，配合四活塞及雙活塞掣動卡鉗，都可以有效減少二衝跑車易放難收帶嚟嘅危險性。

「烈火戰車」Look

■無論標準版或限量版，油缸位置都有冠軍車手Poggiali簽名。

■車頭一雙頭燈，左高燈右低燈，同大多數現代電單車一樣唔可以兩盞一齊着，焗做單眼仔。

■收起兩邊側鏡，泊排骨位指定動作。

■容量達14公升嘅油缸拉花唔算多，重有好多白位可以貼貼紙。

■以跑車嚟講，乘客座墊算係好厚好舒服喇！

■頭尾都採用五幅式輪圈及碟煞，配合軟硬度適中嘅倒立前叉及尾單筒油壓彈簧避震，配套不差。

■尾燈同車尾一樣咁流線，兩邊指揮燈亦採用白燈殼，型！

■頭燈不設開關，只可選擇高燈或低燈。

性能操控夠輕盈

■單筒油壓彈簧尾避震軟硬適中，而且設有預載調校。

■因為車身輕盈，所以轉向尚算靈活。

■排氣喉把聲唔算雄厚，但符合Euro2標準，尚算環保。

■兩圈表板中間設有液晶顯示行車資料如圈速、水溫等。

■大大個後備油缸開關掣喺油缸底，行駛途中無油都非常就手好易扭。

■座墊下有可裝兩件雨褸的載物空間。

2005ApriliaRS125Profile

引擎：124.8cc水冷二衝程單汽缸
缸徑×衝程：54.0×54.5mm
壓縮比：12.5:1
馬力：30ps/11,250rpm
車架：鋁合金雙翼樑
傳動：六前速棍波
懸掛：倒立前叉（前）單筒油壓彈簧（後）
輪胎：110/70-17（前）150/60-17（後）
掣動：透氣碟
尺碼：1950×720×1135mm
軸距：1345mm
座高：805mm
車重：93.5kg
油缸容量：14公升
車輛提供：亞林電單車
（旺角山東街76號地下23859229）