領匯（2382）司法覆核事件全城關注，結果相安無事，法庭判兩名公屋居民敗訴，領匯可如期上市，算是皆大歡喜。其實領匯上唔上到市是閒事，就算上到市亦唔可以令投資者發大達，回報率亦未必高過藍籌股，但事件若糾纏下去，則破壞香港國際金融中心的形象，實非香港之福。
市場好似預咗領匯可以如期上市，法庭雖未有判決，大市已經偷步炒上，恒指收14043，升157點，成交達188億元。期指更大升228點，收報14101，高水58點。睇嚟今日港股或會借法官判決再炒一轉。電盈（008）噚日亦大升5.4%至4.90元，原來市場傳出網通集團直接以9億美元入股電盈29%，並非單單收購固網業務咁簡單，而且好事將近。
科龍（921）無情情大跌17.8%至1.57元，成交高達3137萬元。市場隨即揣測是否公司出事。但據近期經驗，民企出事前多數冇乜徵兆，股份通常會預先被勒令停牌，唔容易偷步出貨。據聞科龍急跌，係因為花旗調低公司投資評級至「沽售」，並叫客戶減持。理由係國內家電市場競爭愈來愈激烈，科龍04及05年度盈利將較預期差。今次明顯係有人將科龍洗倉，據講尚未沽完貨，唔好咁快博反彈。
太平洋航運（2343）在9月中宣布中期業績時冇話派息，等到噚日才宣布每股派8仙，給市場一個驚喜，刺激股價大升8.9%至3.675元，成交達3453萬元。其實保母高盛早前不斷唱好該股，而該股亦有不少基金捧場，今次突然派高息，對捧場客可算是有功課交，同時亦顯示管理層對經營前景及現金流量甚為樂觀。
阿虎