炒股票與炒輪，有時講運多過講眼光。早前推介隻電盈C輪4664（當時0.41元），昨日早段死吓死吓跌到28.5仙，冇眼睇低位沽咗嘅，血壓上升，因為下晝飛上46.5仙，低位彈升63%，同前市比較彈升41%。電盈（008）升5.4%，受傳聞同中國網通集團（網通，906嘅母公司）講掂合作條件刺激，電盈起，自然帶埋C輪紮紮跳。
中企C輪2204：恒指升1.1%，國指升0.9%，跑慢咗少少，估計會跑番快少少，中企C輪諗得過，主角係2204。隻輪明年1月尾夠鐘，輪價10.6仙，溢價2.3%，槓桿率14.4倍（有效10倍），引伸波幅30.5%。去年12月，國指好勁，1個月內由3832彈上5020，升幅31%，爆棚。今個月，國指已經跌咗5%，如果歷史重演，未來兩個幾禮拜國指再生性番，揸2204真係大叫MerryChristmas。
中銀C輪9238：中銀（2388）升0.10元，收14.95元。C輪9693飛升65%，上威水榜第6位；9238升20%。
9693輪價3.8仙，明年4月到期，咪理槓桿率，溢價22.9%，成交金額幾萬，咪嘥氣研究呢隻。9238則不妨研究吓，成交245球，輪價2.4仙，銀碼超過6百萬，溢價1.1%，槓桿率62.3倍，好似有刀仔鋸大樹條件，正股郁幾毫子，隻輪唔講得笑，不過隻輪本月23日最後買賣，剩番7日交易，想刀仔鋸大樹，要有準備把刀仔會斷。炒中銀C輪，行正路，始終係昨日所提嘅9169，明年2月到期，輪價25.5仙，負溢價0.1%，槓桿率5.9倍。平水輪，唔使理有效槓桿率同引伸波幅。
章盛