大學國際化對大學有何好處？宏觀啲講，香港要成為亞洲教育中心，與新加坡爭一日長短，就要多招收外國學生，輸出香港教育，例如澳洲大量招收中國大陸學生，賺大量外滙，澳洲大學成為澳洲一個好大嘅「出口工業」。香港嘅大學有好多限制（因為全部由政府撥款，政策上冇澳洲咁開放），所謂國際化只係希望將外國學生人數佔總學生人數百分之二十咁上下，以目前每年收生一萬四千五百人計，即頂多每年招收二千九百名外國學生。係唔係有咁多東南亞、歐美、非洲等等學生來港留學呀？暫時唔敢講，如果真係有嘅話，證明香港嘅大學受外人尊重，達到國際水平。
收外國學生，可以刺激本地學生講英文，通過日常交流，多瞭解唔同國家嘅文化政治經濟，認識多啲我哋鄰近國家，唔止淨係聽流行曲、睇韓劇咁簡單。話得說回來，有啲香港學生去到外國留學，周圍都俾不同種族嘅外國學生包圍，仍然會自己生活在小圈子內，去唐人街，四年後畢業，好似冇留過學咁，故此未來香港即使招收好多外國留學生，對本地學生可能產生唔到好大影響。
但大學當局當然要訂下目標，抱良好願望，希望帶領香港大專教育進入一個新境界。困難無疑唔少，例如提供獎學金、宿舍、增加英語講學科目等等，有排都未掂，但是千里之行，始於足下，今年開始策劃、推動，事不宜遲嘞。
反對大學國際化有乜嘢好理由呢？諗唔到，反對嘅理由大概與反對自由貿易嘅差唔多，出於保護主義、狹隘主義，有志氣、有胸襟嘅學生，點會相信。