台灣立法院選舉，陳水扁牙擦擦，點知開波唔掂。以民進黨為首嘅泛綠陣營贏得一百零一席，未過半數，反而國民黨反勝，咁就搞到陳總統○六年修憲計劃半天吊。立法院唔過半數，乜憲都唔修，美國佬亦鬆一口氣！
陳水扁呢條友精過龍，而特區嘅阿董就蠢過龍，兩個都各走極端。陳水扁就好似白血球過多，台灣佬鬼咁High，又話獨立，又話孫中山係外國人，內鬥互咬，搞到台灣變咗血癌；而阿董呢？佢就患咗白血球不足症，23條、人大釋法，本來明明係香港內部事務，廢董佢就偏偏搞到特區政府冇晒「高度自治」，亦即《基本法》所賦予對抗中國滲透及干預嘅免疫力，搞到病毒入侵，極度虛弱，少少感冒，例如西九龍及紅灣，都會搞到致命！
不過好彩台灣有民主，內部調節平衡，由國民黨踩「霹叻」，終於勒住少少，控制住啲白血球增長過速。身為香港人，對台灣局勢，香港應該嚴守中立，不過計算番香港實際利益，台灣政府由民進黨揸旗，立法院就由以國民黨掛帥嘅泛藍陣營過半數，咁就會不偏不倚，不統不獨，保持現狀，所以國民黨贏番立法院，正如特區啲庸官從來唔用腦嗰句評論：「係一件好事嚟」。
國民黨連戰及親民黨宋楚瑜，亦唔係儍，佢哋雖然極力反台獨，但十分醒目，同時亦明確拒絕中方嘅所謂「一國兩制」，呢一樣真係令港人擊節讚賞。若然連宋二○○八年奪權，只要揸穩個莊，強化中華民國國體，正式拜祭國父孫中山同埋前總統蔣公，重新扯過支青天白日旗，咁香港六百萬中華同胞，無疑會士氣大振，個心定好多！
國民黨雖然贏番立法院，但個形象好似特區民主黨咁，重好老化。青壯一代冇乜興趣入佢個黨，得番個英偉小生馬英九，都年近花甲，駝背兼有少少皺皮，就算呃師奶，都冇乜兩年再呃得到。只係吸引埋啲過氣國語片明星柯俊雄從政（邊個嚟㗎？喺香港唔係好多人識），真係Out到唔恨，連民建聯都唔會向狄娜招手，邀請呢位六十年代肉彈兼鄭大班初戀情人嚟做副主席喇係咪？
傳真︰2623-9278
電郵︰