名模次次出嚟公開活動，又或者行騷，都會打扮得好光鮮搶眼，不過因為接觸得一啲靚嘢同名牌嘢多，佢哋唔多唔少都崇尚物質，做咗「名牌奴隸」，為咗力撐表面風光，部份名模都好唔自愛咁經營副業。
其中三位名模，最近俾人封咗做「搵食三姊妹」，馮仁昭八到佢哋喺次次活動都極度性感，風騷入骨，力求出位。佢哋一個係引死男人嘅混血小姐，一個就啱啱同男友掟煲嘅大眼名模，重有一個係行徑高調、但知名度唔高嘅高妹。
馮仁昭八過佢哋「搵食三姊妹」係各自去搵食，而三個人之中以混血小姐嘅身價最高，每次都有六位數字，大眼名模最鍾意係接內地客，佢出一次埠去上海，周薪大約有十幾萬，好搵過佢行騷，而高妹雖然身材平平無奇，但話晒都係公眾人物，所以佢每次嘅身價都有五位數字。
周星馳最新嘅電影作品《功夫》就快上畫，佢呢排就周圍去密密做宣傳，似足「巡遊」咁。星爺噚日就去到中國人民大學嘅發布會，同一班學生交流一吓，主題都係圍繞住佢「周星馳的電影藝術與成才之路」，而呢一次係佢喺上海、成都同北京三地出席校園活動嘅最後一站，星爺咁搏命，唔知幾時先會停落嚟唞吓呢。
許志安噚日到灣仔出席活動，安仔將於明年二月底舉行演唱會，其中有一場重畀保險公司包咗場。保險公司會舉行歌唱比賽，得獎者可以同安仔一齊上台唱歌，保險公司重送咗四千五百萬嘅保額畀安仔，安仔話到時個唱連埋自己買嘅保額，足足有成億！連安仔佢自己都話保險公司咁做，已有助佢年尾喺頒獎禮嘅氣勢。
梁詠琪（GiGi）噚日着住旗袍出席喺中環舉行嘅舞台劇《大娛樂家》加場記者會，最近台灣MTV台同一份報紙選咗GiGi做Acup女藝人，噚日同GiGi講開呢單嘢，一聽到A字就以為係好嘢，即刻講多謝，後來同佢解釋話佢身材唔得，佢即笑笑話：「係咩？都一樣多謝，我唔介意，唱歌做戲唔係睇身材嘅。」
黎明喺今個聖誕節會推出全新EP《Love&Promises》，到時隨碟重會附送一套十二款嘅年曆卡，年曆卡上嘅相係黎明拍廣告時嘅照片，所以款款都可以見到佢對住女主角嘅冧樣。原來黎明今次準備呢隻碟嘅時間都好倉卒，前後用咗兩個星期就搞掂，佢話：「因為廣告推出之後，反應都好好，所以先即興搞隻碟，而碟裏面其中兩首就係廣告主題曲。」
麥浚龍（Juno）同組合Bliss噚日去商台接受訪問，講起Bliss成員Oscar好容易撞鬼，之後三個重講到好興奮，Oscar重話佢屋企嗰層，曾先後有兩個女人跳樓，另外又試過瞓瞓吓覺，發現有個女人坐喺自己嘅身上面，Juno喺側邊聽到都話好恐怖。
